Қонақ үйлерге жұлдыз беру жүйесі жаңартылады

АСТАНА, 21 қараша – Sputnik. Қонақ үйлерге "жұлдыз" беру жүйесі жаңартылып, туристік саланы қолдау шаралары кеңейтіледі.

Туризм және спорт министрлігі осы бағытта кешенді жұмысты жалғастырып жатыр.

Ведомство әзірлеген түзетулер пакетіне орналастыру орындарын санаттау жүйесін жаңғырту да енгізілген. Қазіргі уақытта бұл түзетулер мәжілісте қаралып жатыр.

"2008 жылы бекітілген қолданыстағы санат беру ережелері қазіргі заман талаптары мен халықаралық стандарттарға сәйкес келмейді және жаңғыртуды қажет етеді. Жаңартылған жүйе қызмет сапасын жақсартуға, бағалау рәсімдерінің ашықтығын қамтамасыз етуге және қонақ үй индустриясының бәсекеге қабілеттілігін арттыруға бағытталған", - дейді Туризм және спорт министрлігі.

Ұлттық статистика бюросының мәліметіне сәйкес, 2025 жылғы қыркүйекте Қазақстанда 4 442 орналастыру нысаны тіркелген. Алайда олардың тек 112-сі ғана ресми түрде "жұлдыз" санатына ие. Мұндай төмен көрсеткіш апелляция механизмінің болмауымен, бағалау рәсімдерін жүйелі түрде қайта қарау тәжірибесінің жоқтығымен және талаптардың орындалуына бақылаудың әлсіздігімен байланысты болып отыр.

"Жаңартылған санаттау жобасында Hotelstars Union халықаралық қағидаттарына бейімделген нақты бағалау өлшемдері енгізілген. Сондай-ақ Туризм және спорт министрлігінің өкілеттігін кеңейту, инспекторларды оқыту және мамандар даярлау қарастырылған", - дейді ведомство.

Жаңа жүйені енгізу нәтижесінде:

Қонақ үй қызметтерінің сапасы артады;

келушілердің қанағаттану деңгейі жоғарылайды;

Қазақстанның туристік бағыт ретіндегі тартымдылығы күшейеді;

орналастыру нысандарының ресми санатқа қатысу үлесі ұлғаяды.