Қостанай облысында әкімдік инвестордан 146 млн теңгеге жуық қаражатты заңсыз алған

АСТАНА, 24 қазан – Sputnik. Қостанай облысы Бейімбет Майлин ауданының прокуратурасы инвестор "Қазақстан алюминийі" АҚ-ның құқықтарының бұзылғанын анықтады, деп хабарлады бас прокуратура.

2021 жылы аудан әкімдігі кәсіпорынға жер қойнауын пайдалану үшін 1024 га жер учаскесін бөліп, ауыл шаруашылығы шығындары ретінде 145,5 млн теңгені төлеу міндеттелген болатын.

Кейінірек жергілікті атқарушы органдардың актілері сот арқылы заңсыз деп танылып, жер телімі мемлекет меншігіне қайтарылды.

"Соған қарамастан, төленген қаражат кәсіпкерлік субъектісіне уақытылы қайтарылмаған. Керісінше, 2025 жылы жер қойнауын пайдалану үшін жер қайта берілген кезде, кәсіпорын сол мөлшердегі қаражатты тағы да төлеуге мәжбүр болды", - деп жазылған хабарламада.

Прокурорлық қадағалау актісі бойынша 145,5 млн теңге көлеміндегі қаражат инвесторға толық көлемде қайтарылып, жауапты тұлғалар жауапкершілікке тартылды.