Қостанайда зейнеткерлер 3 млн теңгесін алаяқтарға аударып жібермек болған

Қостанайда банк кассирі мен полиция қызметкерлері 3 миллион теңгесін алаяқтарға аударып жібермек болған зейнеткерлерді дер кезінде тоқтатып, ірі қаржы шығынынан құтқарды. Бұл туралы өңірлік полиция департаменті хабарлады, деп жазады Egemen.kz.

Ведомство мәліметінше, 77 жастағы ер адам мен 67 жастағы зайыбы белгісіз біреулердің қоңырауына сеніп қала жаздаған. Өзін банк қызметкері ретінде таныстырған алаяқтар олардың депозиті «бұзылғанын» айтып, қаражатты «қауіпсіз шетелдік шотқа» тез арада аударуды талап еткен.

Зейнеткерлер күмәнданғанына қарамастан, шоттарынан 3 миллион теңге шешіп алып, банкте аударым жасауға келген. Сол кезде касса қызметкері төлемнің мақсаты ретінде көрсетілген «дәрігерге алғыс» деген белгілеуге күмәнданып, бірден полиция шақырған.

Оқиға орнына киберқылмысқа қарсы іс-қимыл басқармасының қызметкерлері келіп, зейнеткерлерге алаяқтық жасалғанын түсіндірді. Полицейлер ақшаны депозитке қайта салуға көмектесіп, қоңырау шалған тұлғалардың нөмірлерін бұғаттады.

Зейнеткерлер полицейлер мен кассирге алғыстарын білдіріп, жағдайды былай баяндады: «Бізге біреу хабарласып, депозитімізге қауіп төніп тұрғанын айтты. Ақшаны алып, басқа шотқа жіберу керектігін түсіндірді. Жұбайым соған сеніп қала жаздады. Уақтылы тоқтатқан кассир мен полицияға рақмет».