Қымыз, соғым және гаджеттер Қазақстанда ұшаққа не алуға болады және неге тыйым салынған

Сапар алдында жолаушыларда бірдей сұрақтар туындайды: ноутбукті бөлек сөмкеге салуға бола ма, пауэрбанкті қайда салу керек, бортқа құрт немесе қазы алып өтуге рұқсат беріле ме және қымыз тасуға бола ма? Әуекомпаниялар ережесі әртүрлі, ал кейбір шектеулер Қазақстан бойынша немесе шетелге ұшуыңызға байланысты өзгере береді. Tengri Travel агенттігі Air Astana, FlyArystan, Scat және VietJet Qazaqstan рейстерінде заттарды тасымалдаудың негізгі ережелерін жинақтады.

Қол жүгіне не салған дұрыс?

Астана әуежайындағылар ескерткендей, шектеулер тек әуекомпанияларының ережелеріне ғана емес, сонымен қатар халықаралық қауіпсіздік талаптарына да байланысты. Ең маңызды заттарды өзіңізде ұстаған абзал. Қол жүгіне мыналарды салу ұсынылады:

құжаттар; ақша және банк карталары; телефон және басқа да электроника; ноутбук; дәрі-дәрмектер; зарядтау құрылғылары мен пауэрбанктер.

Instagram-дағы бұл жазбаны көру

ASTANA INTERNATIONAL AIRPORT (@nqz_airport) бөліскен жазба

Сондай-ақ Алматы әуежайында чемодандағы ескі багаж биркаларын алдын ала алып тастауды, ал отырғызу талоны мен жеке куәлікті қолжетімді жерде ұстауды кеңес береді. Ірі және ауыр заттарды oversized baggage (ірі габаритті багаж) сөресі арқылы рәсімдеу ұсынылады.

Салонға сөмке, рюкзак және ноутбук алуға бола ма?

Бұл ретте ережелер айтарлықтай ерекшеленеді.

Air Astana

Тариф бойынша қол жүгінен бөлек жолаушылар салмағы 3 келіге дейін және үш өлшемнің қосындысы 80 сантиметрден аспайтын бір шағын жеке затты тегін ала алады. Мысалы, бұл:

әйелдер сөмкесі; шағын рюкзак; ерлер портфелі болуы мүмкін.

Бөлек түрде таяқ, балдақтар, шағын балалар бесігін, шағын торт, гүл шоғын және чегі болған жағдайда Duty Free-ден сатып алынған заттарды тасымалдауға рұқсат етіледі.

FlyArystan

Әуекомпаниясында ережелер қатаңырақ. Жолаушы бортқа алатын барлық зат қол жүгінің жалпы нормасына қосылады.

Ноутбукті, сөмкені немесе пакетті бөлек тегін алуға болмайды. Тек халықаралық рейстердегі Duty Free-ден сатып алынған және дүкеннің фирмалық қаптамасындағы заттар ғана ерекшелік болуы мүмкін.

Scat

Scat шағын сөмкелер, рюкзактар, техника және басқа да жеке заттар қол жүгінің жалпы нормасында есептеледі. Рұқсат етілген салмақ таңдалған тарифке байланысты болады.

VietJet Qazaqstan

VietJet Qazaqstan-да бір жеке затты алуға болады. Әуекомпаниясының ережелеріне сәйкес жеке заттарға мыналар жатады:

әйелдер сөмкесі; кітап немесе журнал; фотоаппарат; балалар тағамы салынған сөмке; Duty Free-ден сатып алынған заттары бар пакет; өлшемдері сәйкес келген жағдайда ноутбукке арналған бөлек сөмке.

Фото: depositphotos.com

Қазы, шұжық, құрт және қымыз: нені тасымалдауға болады?

Азық-түлік - жолаушылар жиі сұрайтын тақырыптардың бірі. Бұл ретте ұлттық өнімдерді тасымалдау ережелері әуекомпанияларда әртүрлі.

Air Astana

Мысалы, ішкі рейстерде Air Astana ет пен балықты багажда тасымалдауға рұқсат береді, бірақ қаптамаға қойылатын талаптар қатаң сақталуы тиіс.

Өнімдер сұйықтық өткізбейтін және иіс шығармайтын болуы керек, сондай-ақ бірінші және соңғы қабаты тығыз полиэтиленнен жасалған кемінде үш қабатты берік қаптамасы болуы тиіс.

Басқа тағамдарға келетін болсақ, қол жүгіне мыналарды алуға болады:

аз мөлшердегі жемістер мен көкөністер; жаңғақтар мен кептірілген жемістер; печенье және крекерлер; герметикалық қаптамадағы тұздықсыз және сорпасыз дайын тағамдар.

Паштеттер, пасталар, жұмсақ ірімшіктер және сұйық немесе крем тәріздес басқа да өнімдерге салон ішінде тек көлемі 100 миллилитрге дейінгі ыдыстарда рұқсат етіледі.

Тағам тасымалдау ережелері тек ішкі рейстерге қатысты екені ескертіледі. Халықаралық ұшулар кезінде баратын елге өнімдерді алып кіру ережелерін алдын ала тексеру қажет.

FlyArystan

FlyArystan ет пен балықты тек тіркелген багажда тасымалдауға болады.

Қаптамаға қойылатын талаптар:

ылғалға төзімді берік ыдыс; үш қабатты қаптама; сұйықтық ағудан қорғаныс.

Сүт өнімдерін, соның ішінде сүт, қымыз, шұбат, қаймақ және сүзбені тек багажда және салқындатылған күйде тасымалдауға рұқсат етіледі.

Ыдыс тығыз жабылып, шамамен төрттен бесіне дейін толтырылуы керек. Сонымен қатар, оны үш қабатты қаптамаға және қатты сыртқы қорапқа салу қажет.

Scat

Әуекомпания өкілдерінің айтуынша, ет және ұлттық деликатестерді, соның ішінде қазы мен шұжықты тасымалдауға рұқсат етіледі. Жолаушыларға сұйықтық ақпауы және иіс тарамауы үшін герметикалық немесе вакуумдық қаптаманы пайдалану ұсынылады.

Сұйық сүт өнімдерін - сүт, қымыз, шұбат, айран және қаймақты бортына алуға тыйым салынады.

Ал құрт сияқты қатты және құрғақ өнімдерді сенімді қапталған жағдайда қол жүгімен де, багажбен де тасымалдауға болады.

Өнімдер үшін бөлек салмақ шектеуі жоқ: олардың салмағы қол жүгінің немесе багаждың жалпы нормасына кіреді.

VietJet Qazaqstan

Әуекомпания сайтындағы мәлімет бойынша, жас және мұздатылған ет өнімдері мен теңіз өнімдерін қаптама талаптары сақталған жағдайда ғана багажда тасымалдауға болады. Мұндай өнімдер үшін арнайы изотермиялық контейнерлер және қосымша тексеру қажет.

Косметика және сұйықтықтар: салонға не алуға болмайды?

Қол жүгіндегі сұйықтықтар, гельдер мен аэрозольдер көлемі 100 миллилитрден аспайтын ыдыстарда болуы тиіс.

Шектеу мыналарға қолданылады:

сусабындар; кремдер; лосьондар; тіс пастасы; тушь; сұйық косметика; спрейлер.

Көлемі үлкенірек өнімдерді багажға тапсыру керек.

Балалар арбасы: қай жерде тегін рұқсат етіледі?

Балалар арбасын тасымалдау - бөлек санат, себебі тасымалдаушылардың арбаларға қоятын талаптары әртүрлі.

Air Astana

Әуекомпания ережелеріне сәйкес, бір портативті балалар бесігін немесе жиналмалы арбаны тегін алуға болады. Жиналған күйінде оның өлшемі 34 × 32 × 14 сантиметрден аспауы тиіс.

FlyArystan

Әуекомпания сайтындағы мәлімет бойынша, бес жасқа дейінгі әр балаға бір жиналмалы арбаны тегін тасымалдауға рұқсат етіледі. Ол қол жүгінің өлшемдеріне сәйкес келуі керек - 56 × 23 × 36 сантиметрден аспауы тиіс.

Scat

Әуе тасымалдаушысының ережелеріне сәйкес, егер арба жолаушымен бірге ұшатын балаға арналған болса, бір жиналмалы балалар арбасы тегін қабылданады.

Шектеулер:

жиналған күйдегі өлшемі - 55 × 40 × 25 сантиметрден аспауы керек; салмағы - 10 келіге дейін. VietJet Qazaqstan

Әуекомпания сайтында арбалар тегін тасымалданатыны көрсетілген, алайда бұл санат үшін нақты габариттік шектеулер нақтыланбаған.

Фото: depositphotos.com

Домбыра мен басқа да аспаптарды тасымалдау туралы не білу керек?

Бұған дейін Азаматтық авиация комитеті қазақстандықтардың көптеген өтініштерінен кейін домбыра, қобыз және басқа да музыкалық аспаптарды салонда тегін тасымалдауға рұқсат беру туралы шешім қабылдады.

Жалпы ереже: егер аспаптың салмағы 10 келіден, ал өлшемдері 110 × 35 × 30 сантиметрден аспаса, оны қол жүгі ретінде алуға болады.

Егер аспап қол жүгіне қосымша тасымалданса, ол үшін үстеме ақы төлеуге тура келеді.

Air Astana

Ал Air Astana виолончель немесе контрабас сияқты ірі аспаптар үшін салонда бөлек орын сатып алу қажет екені көрсетілген.

Аспаптың салмағы 75 келіден, ал өлшемдері 112 × 42 × 50 сантиметрден аспауы тиіс.

Егер аспап багажға өткізіліп, тегін нормадан асып кетсе, артық салмақ үшін төлеу керек болады. Тегін норма қызмет көрсету класы мен тарифке байланысты.

FlyArystan

FlyArystan ережесіне сәйкес, егер аспаптың салмағы 10 келіден, ал өлшемдері 110 × 30 × 30 сантиметрден аспаса, оны қол жүгі ретінде өткізуге болады.

Сондай-ақ аспап үшін алдын ала бөлек орын сатып алуға немесе қосымша қол жүгін рәсімдеуге болады. Бұл - ақылы қызмет.

Scat

Scat музыкалық аспаптар үшін қол жүгінің нормалары қолданылады: өлшемдері 55 × 40 × 25 сантиметрден аспауы керек.

Рұқсат етілген салмақ тарифке байланысты және 5-тен 10 келіге дейін болады.

Үлкенірек аспапты багажға тапсыру немесе ол үшін салонда бөлек орын рәсімдеу қажет.

VietJet Qazaqstan

Vietjet Qazaqstan ережесінде салмағы 10 келіге дейінгі және өлшемі 120 × 50 × 30 сантиметрден аспайтын аспапты қол жүгі ретінде тасымалдауға болатыны көрсетілген.

Салмағы 75 келіге дейінгі ірі аспаптарды жеке жолаушылар орнына орналастыруға рұқсат етіледі.

Әуекомпаниялар қаптама мәселесін алдын ала ойластыруды ұсынады. Салонда тасымалдау үшін жұмсақ қап, ал жеке орынды қажет ететін аспап үшін қатты футляр қолайлы.

Фото: depositphotos.com

Пауэрбанктер мен аккумуляторлар: тек қол жүгімен

Барлық әуекомпания ережелеріне сәйкес, пауэрбанктерді багажға тапсыруға болмайды - олар тек қол жүгінде тасымалданады.

Негізгі талаптар:

сыйымдылығы - 160 ватт-сағатқа дейін (шамамен 43 000 мА·сағ дейін); 100-ден 160 ватт-сағатқа дейінгі (шамамен 27 000–43 000 мА·сағ) аккумуляторлар үшін әуекомпания рұқсаты қажет.

Әдетте бір жолаушыға сыйымдылығы 100-ден 160 ватт-сағатқа дейінгі (шамамен 27 000–43 000 мА·сағ) екіден аспайтын қосалқы батарея алуға рұқсат етіледі. Ұшу кезінде пауэрбанкті пайдалануға тыйым салынады.

Өзіңізбен бірге алуға болмайтын заттар

Әуекомпаниялардың тыйым салынған заттар тізімі негізінен ұқсас келеді. Кейбір заттарды қол жүгінде де, багажда да тасымалдауға болмайды:

жарылғыш заттар мен фейерверктер; тез тұтанатын газдар мен сұйықтықтар; улы және токсинді заттар; радиоактивті материалдар; сығылған газдар; химикаттар мен бояулар; сіріңкелер мен оттықтар; оқ-дәрілер; кастеттер; тотықтырғыш заттар; коррозиялық заттар; биологиялық қауіпті және инфекциялық материалдар; көз жасаурататын және бұрыш спрейлері, электрошокерлер; балық аулауға арналған жабдықтар - спиннингтер, қармақтар; жарылғыш құрылғылардың муляждары мен имитациялары; құрамында оттегі мөлшері жоғары заттар, мысалы, асқын тотықтар мен ағартқыш ұнтақтар; литий батареялары бар шағын моторлы көлік құралдары.

Жекелеген ережелер әуекомпания, бағыт және баратын елге байланысты өзгеше болуы мүмкін. Сондықтан жолаушыларға сапар алдында тасымалдаушының өзекті талаптарын алдын ала тексеріп алған жөн.

Тағы оқыңыз: Еуропада шабадандарға бір рет қолданылатын пленканы пайдалануға тыйым салынуы мүмкін

Google News арқылы жаңалықтарымызды қадағалаңыз

Жазылу