Қыз баланы неге түс ауғанша ұзатқан? : Света Айтбаева пікір білдірді

Әнші Света Айтбаева әлеуметтік желідегі парақшасында қыз ұзатуға қатысты пікір білдірді, – деп жазды Aikyn.kz.

Өнер иесі салт-дәстүр туралы ой қозғады. Айтуынша, аялап өсірген қызын қияға қондырып, ақ босаға аттатқан қуанышты әрі қимастыққа толы сәттің өзіндік жөн-жоралғысы бар.

«Қазақ қыз баланы түс ауғанша ұзатқан. Оның өзіндік терең мағынасы бар. Соңғы жылдары түнгі 12-де мейрамханадан шығарып жіберетін әдет пайда болды, мүмкін уақытты үнемдеудің шарасы болар. Біздің өңірде той өткен соң ертеңіне арнайы қой сойып, қыз бен күйеуге, құдаларға қонақасы беріледі. "Қыз - қонақ " деген сөз осы дәстүрге қатысты да айтылған болуы керек. Әкесінің босағасынан алғаш рет қонақ ретінде арнайы қонақасын жеп, өз жұртына аттанады. Маңдайы ашық болсын деп, таң нұрына, күн сәулесіне бөленіп, ел-жұртының батасын алып өз босағасынан шығады. Жеңгелері құдалардың көрімдігін алып, қыз жасауын көшке тиейді . "Құда тартар " салтын жасап , әзіл - қалжыңмен, ақ батамен, сән - салтанатымен қызды шығарып салады. Міне, біз де Раушантайды ата - баба салған жолмен, сол дәстүрден ауытқымай ұзаттық», - деді әнші. 

Желі қолданушылары әншінің бұл пікіріне қолдау білдірді.

«Салт-дәстүрімізді жаңғыртып, халқымызға үлгі көрсеткеніңіз үшін мың алғыс! Балаларға бақ тілеймін, бақыт тілеймін. Қосағымен қоса ағарсын», «Өте дұрыс айтасыз. Біз екі қыз ұзаттық, екеуін де ұзатудың ертеңіне үйден аттандырдық. Даладан, мейрамханадан күйеубалаға жетектетіп жібергенді қаламаймын өз басым», «Нағыз қазақтың салт-дәстүрін ұстанған жансыздар!», деп жазды желі қолданушылары.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.