Қызылжардағы жол апаты: жеңіл көлік пен жүк көлігі өртеніп, екі адам қаза тапты

Солтүстік Қазақстан облысының Қызылжар ауданында өліммен аяқталған жол-көлік оқиғасы тіркелді, – деп хабарлайды Aikyn.kz сайты. 

Toyota Camry жеңіл көлігі мен Shacman жүк көлігі соқтығысып, салдарынан жүргізуші мен жолаушы көз жұмды.

Апат шамамен сағат 15:10-да Жезқазған — Арқалық — Петропавл автожолының 927-шақырымында, Карлуга ауылы маңында болды. Алдын ала мәліметтерге сәйкес, Петропавл қаласынан Явленка ауылы бағытына келе жатқан 55 жастағы Toyota Camry жүргізушісі рөлге ие бола алмай, қарсы қозғалыс жолағына шығып кетіп, 37 жастағы ер адам басқарған ауыр жүк көлігімен соқтығысқан.

Соқтығысудан кейін жеңіл автокөлік пен жүк көлігінің кабинасы өртенді. Toyota Camry жүргізушісі мен жолаушысы оқиға орнында қаза тапты. Ал жүк көлігінің жүргізушісі кеуде тұсынан соққы алғанымен, ауруханаға жатудан бас тартты.

Солтүстік Қазақстан облысы полиция департаментінің мәліметінше, жол-көлік оқиғасы фактісі бойынша қылмыстық іс қозғалды. Қазіргі таңда апаттың себептері мен мән-жайы анықталып жатыр.