Батыс Қазақстан облысындағы жол апаты: көлік өртеніп, 8 адам қаза тапты

Бүгін Батыс Қазақстан облысы Жаңақала ауданына қарасты Қызылоба ауылы маңында ірі жол-көлік оқиғасы тіркелді, – деп хабарлайды Aikyn.kz сайты.

Әлеуметтік желілерде куәгерлер хабарлағандай, қайғылы оқиға салдарынан 8 адам қаза тауып, 4 адам ауруханаға жеткізілді.

Белгілі болғандай, Toyota Camry мен Volkswagen Sharan маркалы көліктер апатқа ұшыраған. Куәгерлердің айтуынша, көліктердің біреуі толықтай өртеніп кеткен. Екі көлік те Жаңақаладан шыққан такси ретінде қызмет көрсетіп жүрген.

БҚО денсаулық сақтау басқармасының баспасөз қызметінің мәліметінше, жарақат алған 4 азаматтың жағдайы орташа ауыр. Олар Ақжайық аудандық ауруханасына жеткізіліп, медициналық тексеруден өтіп жатыр.

БҚО Полиция департаментінің ресми өкілі Нұржан Қуанғали аталған фактіге қатысты пікір білдірді:

«Бұл жол-көлік оқиғасы бойынша қылмыстық іс қозғалды. Алдын ала болжамға сәйкес, жүргізушілердің бірі қарсы бағытқа шығып кеткен болуы мүмкін», – дейді ол.