Ресейдегі бензин дағдарысы: Қазақстан көмектесе ме?

Ресей Қазақстаннан 50 мың тонна АИ-92 маркалы бензин сатып алу мүмкіндігін талқылап жатыр.
Сонымен қатар ресейлік мұнайды қазақстандық мұнай өңдеу зауыттарында өңдеп, дайын жанармайды қайтадан Ресейге жеткізу нұсқасы да қарастырылуда.

Мұндай қадамға Ресейдегі жанармай тапшылығы себеп болып отыр. Соңғы айларда бірқатар мұнай өңдеу зауыттарының жұмысы тоқтап, бензин өндірісі айтарлықтай қысқарған.

Сарапшылардың мәліметінше, тапшылықтың негізгі себебі – украиналық дрон шабуылдарынан кейін бірнеше ірі мұнай өңдеу кәсіпорындарының істен шығуы. Маусым айында Орталық Ресейдегі зауыттардың бір бөлігінің тоқтауына байланысты бензин өндірісі өткен жылдың сәйкес кезеңімен салыстырғанда 25 пайызға азайған.

Reuters агенттігінің хабарлауынша, Ресейдегі ең ірі кәсіпорындардың бірі саналатын Мәскеу мұнай өңдеу зауыты ауыр зақым алып, кемінде алты ай бойы жұмыс істемейді. Кәсіпорын өткен жылы 11,6 миллион тонна мұнай өңдеп, 2,9 миллион тонна бензин өндірген болатын.

Жанармай тапшылығының күшеюіне байланысты Ресей билігі уақытша шараларға жүгінуде. Атап айтқанда, сапасы төмендетілген бензин мен дизель отынын өндіруге рұқсат беріліп, теңіз арқылы импорттау мүмкіндігі қарастырылып жатыр. Сонымен қатар дизель экспортына уақытша шектеу енгізу мәселесі де талқылануда.

Бірқатар өңірлерде жанармай тапшылығы байқалып, тұтынуды үнемдеу шаралары қолға алынған.

Осы жағдайда Қазақстан Ресей үшін ықтимал жеткізушілердің біріне айналып отыр. Алайда бұл мәселенің оңай шешілуі екіталай. Себебі жақын күндері Атырау мұнай өңдеу зауыты жоспарлы жөндеуге тоқтайды.

АМӨЗ-де 26 маусым мен 20 шілде аралығында жүргізілетін жөндеу жұмыстары кезінде жиналған жанармай қорының бір бөлігі пайдаланылатындықтан, Қазақстан үшін ішкі нарықты тұрақты қамтамасыз ету мәселесі де өзекті болып қала береді.

Сондықтан сарапшылар Ресейдің сұранысын қанағаттандыру туралы шешім қабылданған жағдайда, ең алдымен елдің ішкі жанармай қауіпсіздігі мен қор көлемі ескерілетінін айтады.