Республика күніне орай Қазақстанда 200 ге жуық жаңа нысан ашылып жатыр

АСТАНА, 25 қазан – Sputnik. Республика күніне орай Қазақстанда 200 ге жуық жаңа әлеуметтік маңызы бар және өнеркәсіптік нысандар ашылып жатыр, деп хабарлады үкімет.

"Республика күніне орай бүкіл еліміз бойынша ірі өнеркәсіптік кәсіпорындардан бастап әлеуметтік, спорттық және инфрақұрылымдық жобаларға дейін 196 жаңа нысан пайдалануға беріледі. Олардың барлығы Мемлекет басшысы Қасым-Жомарт Тоқаевтың халықтың өмір сүру сапасын арттыруға және өңірлерді дамытуға бағытталған тапсырмаларын орындау шеңберінде жүзеге асырылып жатыр", - деп жазылған хабарламада.

Бұл әлеуметтік маңызы бар және өнеркәсіптік нысандар қатарында Қостанай облысындағы "KIA QAZAQSTAN" компаниясының KIA автокөліктерін шығаратын ірі өндірістік зауыты іске қосылды.Кәсіпорында 1500 жұмыс орны құрылады.

Сонымен қатар, Жетісу облысындағы "Қайнар-АКБ" зауытында аккумулятор шығаратын жаңа өндіріс желісі іске қосылды. Екібастұзда алғашқы ферроқорытпа зауыты ашылды.

Бұдан бөлек Қызылорда, Талдықорған, Маңғыстау сынды тағы бірқатар өңірде нысандар ашылып отыр.