Сарапшы: Қазақстан өңірлік көшбасшы

«Қазақстан – Орталық Азияның тоқтаусыз дамып келе жатқан жетекші экономикасы. Бұл әлеуетке қол жеткізу жолында мемлекет сарабдал саясат ұстанып, сан алуан бағытты қамтитын экономикалық серпіліс жасады». Араб әмірліктеріне танымал журналист, медиаменеджер Абдулрахим Абдулуахид арнамызға берген сұхбатында осылай деді. 

Сарапшы Қазақстанның өткені мен бүгіні турасында кеңінен әңгіме өрбітіп, айшықты тұстарына тоқталды. Айтуынша, кез келген мемлекеттің ішкі тұтастығы мен тұрақтылығы халықаралық қатынастарға тікелей байланысты. Қазақ елі қос бағытты қатар ұстанып қана қоймай, барлық тараппен теңгерімді саясат жүргізді. Батыспен де, шығыспен де тығыз экономикалық ынтымақтастық орнады. Нәтижесінде түрлі деңгейде бірлескен жобалар көптеп қолға алынып, тұрақты экономикалық өсім жалғасып келеді. «Бұл бір есептен - Қазақстанның өңірлік көшбасшылығын білдіреді», - дейді араб маманы.

Абдулрахим Абдулвахид, "Media Hub International" компаниясының бас директоры:

-  Алдағы 10 жыл Қазақстан үшін одан әрі мықтырақ бола түсуге кең мүмкіндіктер ұсынып отыр. Осы аралықта елдің даму қарқыны еш тежелмесе, алдыңғы қатарлы 30 мемлекет көшіндегі орындарыңызды нығарлай түсесіздер. Менің ойымша, енді сіздер араб-мұсылман әлемімен ынтымақтастықты тереңдетулеріңіз керек. Біздің нарықпен байланыс бизнес қана емес, әлеуметтік, рухани, мәдени бағытта да бекігені маңызды. Сөзсіз Қазақстан - Орталық Азияның ең ірі экономикасы. Осындай әлеуетке қол жеткізуге қаншама күш жұмсалды. Енді мұның барлығын еселеу қажет. Біз Қазақстанның мықты болғанын қалаймыз.