Semei телеарнасы: 60 жыл эфирде

Қазақ телевизиясы тарихында алғашқы «Айтыс» бағдарламасы Семейдегі телестудияда түсірілген. 

Биыл «Semei» телеарнасының ашылғанына 60 жыл толды. Өңірдің басты арнасы талай буын журналистерді тәрбиеледі. Мерейлі мерекеге орай салтанатты шара өтті.

1965 жылдың 1 қыркүйегінде Семей телестудиясының алғашқы хабары эфирге шықты. Бұл Алматы, Қарағанды, Өскемен, Ақтөбе телевизиялық студияларынан кейінгі эфир еді. Қазақ тележурналистикасының мэтрі Фатима Бегенбаева еңбек жолын Семейдегі студиядан бастаған. Ол Кеңес одағының ұшқыш-ғарышкері Герман Титовпен сұхбаттасқан әлемдегі алғашқы журналистердің бірі.

Фатима Бегенбаева, ардагер журналист:

- Көз алдыңызға 1965 жылды елестетіңізші, қандай техника болуы мүмкін? Студияның ішінде тек бір камера, бір стол. Алдыңызда жарық, оператор оны бір сағаттай әрі жүгіріп, бері жүгіріп қояды. Ал жасанды интеллектпен қаруланған бүгінгі заманға сай жастарды көріп, олардың жаңа еңбектерін көріп өте қуандым.

Арна заман талабына сай жаңарып, ақпарат таратудың жылдам әрі сапалы үлгісін қалыптастырып отыр. «SEMEI» арнасы тәулігіне 14 сағат хабар таратады. Көрерменге 30-ға жуық авторлық бағдарлама ұсынылады. Жаңалықтар күніне бес рет шығады. Кәсіби журналистер, операторлар мен техник мамандар көрермен сенімін ақтап, өңір медиасының дамуына үлес қосып келеді.

Нұрбек Бекен, «Semei» телеарнасының директоры:

- Семей қаласына Герман Титов келген. Сол кезде біздің алғашқы дикторларымыздың бірі Фатима Мамырбекқызы сұхбат алады. Біз сол фотоларды жандандырып, сол кезге саяхат жасадық. Заман талабына сай жұмыс істеуміз керек. 1965 жылы телеарна қалай ашылды? Біздің алғашқы дикторларымыз қалай сөйледі? Біз соның барлығын суреттерді сөйлетіп, өткенге саяхат жасадық. Көрерменге ұнап жатыр.

Мерейтой аясында телеарна ұжымына қызметтік көлік табыс етілді. Бірнеше қызметкерге «Еңбек ардагері» медалі мен «Ақпарат саласының үздігі» төсбелгісі берілді. ҚР Мәдениет және ақпарат министрлігінің Алғыс хаты және Құрмет грамотасымен марапатталғандар да болды.

Бақытгүл Қазез, «Semei» телеарнасының редакторы:

- Студент кезімде кастингтен өтіп, тележүргізуші, жаңалықтар дикторы болдым. Екі тілде диктормын. Осы күнге дейін мықты мамандардан сабақ алдым. Мықты мамандармен жұмыс істедім. Сол кісілердің арқасы деп ойлаймын бүгінгі алып отырған марапатым. Әрине, кез-келген журналист үшін ең басты марапат халықтың ықыласы. Сондықтан материалдарымыз көп болсын. Жағымды жаңалықтармен эфирде кездескенше.

Семей телеарнасының ұжымы алдағы уақытта да сапалы контентті көбейтіп, ақпарат кеңістігінде бәсекеге қабілетті болуды көздейді.

Авторлары: Рүстем Қайратұлы, Мәди Базарбеков