Сенатор Зерендідегі тарихи өлкетану мұражайы құрылысындағы проблеманы атады

Депутат бұл жоба Орнықты даму мақсаттарының 11-ші бағыты аясында Ақмола облысының Зеренді ауданында жүзеге асып жатқанын хабарлады. Жоба мәдени мұраны сақтау, жаңаша индустрияларды дамыту және туристерді қолдау үшін көпфункционалды кеңістік құруды көздейді. Бұл ретте, ауданның «Бурабай» және «Шалқар» курорттық аймақтары арасында орналасуы нысанды туристер үшін тартымдылық нүктесі ретінде қарастыруға мүмкіндік береді.

Сенатор жобаның жалпы құны 1 млрд 170 млн теңге болған кезде оны іске асыруға 200 млн теңге бөлінгенін, бұл ретте қаржыландыру тапшылығы 878 млн теңге болатынын атап өтті.

— Қазіргі уақытта қаржыландырудың болмауына байланысты жобаны іске асыру іс жүзінде тоқтатылды. Жобаны қаржыландыру мақсатында 2025 жылы Ақмола облысының әкімдігі Ұлттық экономика министрлігіне бірнеше рет бюджеттік өтінім жолдады. Алайда, аталған өтінімдер бюджет қаражатының тапшылығына байланысты қолдау таппады. Ақмола облысының субвенционалдығын және облыстық бюджеттің шектеулі мүмкіндігін ескеретін болсақ, жоба әлеуетті ұзақ мерзімді құрылысқа айналатындай. Жоғарыда айтылғандардың негізінде Зеренді ауылындағы визит-орталықпен біріктірілген тарихи-өлкетану мұражайының құрылысын аяқтау үшін биыл Арнаулы мемлекеттік қордан қаражат бөлуге жәрдем көрсетуді сұраймыз, — деді Талғат Жүнісов Үкімет басшысының атына жолдаған сауалында.

Айта кетейік, бұған дейін Зерендіде балалар мен жасөспірімдер спорт мектебі ашылғанын жазған едік.