Сенім негізгі ресурс: AMANAT тұрғын үй коммуналдық шаруашылығы саласындағы жүйелі мәселелерді шешуде

«AMANAT» партиясы көппәтерлі тұрғын үйлерді басқарудың заманауи әрі ашық жүйесін қалыптастыруға бағытталған республикалық «TURGYNDAR AMANATY» жобасын жүзеге асыруды жалғастыруда. Бастаманы еліміздің барлық өңірінде қолға алу жұмысы аясында МИБ және ПИК төрағаларына, мәслихат депутаттарына және тұрғындарға арналған оқыту семинар-форумдары өткізілуде, – деп хабарлайды Aikyn.kz сайты.

Мәселен, «Үйді басқару: жауапкершілік, сенім, нәтиже» тақырыбындағы кезекті диалог алаңы Көкшетау қаласында ұйымдастырылды.

Талқылау барысында тұрғын үй-коммуналдық шаруашылығы саласындағы ең өзекті мәселелер көтерілді. Атап айтқанда, инженерлік желілердің тозу деңгейінің жоғарылығы, қаржылық және ұйымдастырушылық ресурстардың жеткіліксіздігі, сондай-ақ төлемдердің ашықтығы мен басқарушы құрылымдардың тиімді жұмыс істеуі сынды бірқатар мәселеге назар аударылды. Бүгінде пәтер иелері кооперативтері мен мүлік иелері бірлестіктерінің атына жиі өтініштер мен шағымдар келіп түседі. Бұл өз кезегінде басқарудың жаңартылған моделіне деген сенімді нығайту және жүйелі шешімдер қабылдау қажет екенін көрсетіп отыр.

Мәжіліс депутаты Юлия Кучинская бұған дейін депутаттық корпус пен партия мүшелері тұрғын үй-коммуналдық шаруашылығы саласына қатысты заңнамаларға түзетулер енгізуге бастамашылық еткенін және олар қазір өз күшіне енгенін атап өтті. Жаңа нормаларға сәйкес, 2026 жылғы 1 қыркүйекке дейін барлық пәтер иелері кооперативтері қайта тіркеуден өтіп, басқарудың заңды субъектісі ретінде қызмет етуге тиіс. Өзгерістердің басты мақсаты – меншік иелерінің құқығын қорғау және басқарушы құрылымдардың қызметіндегі ашықтықты қамтамасыз ету.

Форумда жарияланған деректерге сәйкес, өңірде шамамен 3800 көппәтерлі тұрғын үй бар. Соның 400-ге жуығы мүлік иелері бірлестігі, ал 800-ге жуығы пәтер иелері кооперативі ретінде тіркелген. Солай бола тұра, тұрғындардың жаңа басқару жүйесіне деген сенімі – әлі де жеткіліксіз деңгейде. Бұл өз кезегінде, ақпараттық-түсіндіру жұмысын күшейтуді және халықпен тікелей диалог орнатуды талап етеді.

Жоба аясында тұрғындарға кеңес беру, оқыту курстары мен семинарлар өткізу мақсатында мамандандырылған фронт-офис ашу жоспарлануда. Мұнда азаматтар тұрғын үй қатынасы, әлеуметтік бағдарламалар және қолданыстағы заңнама мәселелері бойынша кеңес ала алады. Мұндай формат меншік иелерінің құзыретін арттырып қана қоймай, тиімді кері байланыс тетіктерін қалыптастыруға мүмкіндік береді.

Көппәтерлі үйлерді басқару саласындағы кәсіби қауымдастық өкілі Айгүл Аринованың айтуынша, жүргізіліп жатқан реформалардың басты мақсаты – азаматтарға жайлы әрі қауіпсіз орта құру. Алайда аталған мақсаттарға қол жеткізу үшін тұрғындар белсенді атсалысуы және тұрғын үйді басқару саласында білікті мамандар даярлау жұмысы жолға қойылуы қажет.

Ұйымдастырушылар жобаның жүйелі жүзеге асырылуы мемлекет, сарапшылар қауымдастығы және тұрғындар арасындағы ашық әрі сындарлы өзара іс-қимылға байланысты екенін атап өтті. «TURGYNDAR AMANATY» жобасы осындай серіктестікті қалыптастыруға және мыңдаған қазақстандық отбасының көкейіндегі мәселелерді шешуге арналған тиімді алаң болуға тиіс. Жобаның негізгі мақсаты – тұрғын үй меншік иелерінің басқару процесіне араласу мүмкіндігін кеңейту, тұрғындардың құқықтық және қаржылық сауатын арттыру, сондай-ақ ортақ мүлікке жауапкершілікпен қарау мәдениетін қалыптастыру.

«TURGYNDAR AMANATY» жобасы былтыр Астана қаласында пилоттық режимде іске қосылды. «OSIskills» бағдарламасы бойынша 707 МИБ және ПИК төрағасы практикалық оқытудан өтті. Коммуналдық қызмет өкілдері мен салалық сарапшылардың қатысуымен семинарлар ұйымдастырылып, қатысушыларға қолданыстағы заңнама түсіндірілді. Сондай-ақ олар ортақ мүлікті тиімді әрі ашық басқару құралдарын меңгерді.

Пилоттық кезең жобаның сұранысқа ие екенін және оның қолданбалы сипатын айқындады. Бірмандатты округтер бойынша сайланған мәслихат депутаттары тұрғындармен есептік кездесулер өткізді. Соның нәтижесінде нақты өтініштер қаралып, өз шешімін тапты. Биыл жоба толыққанды республикалық бастама ретінде жүзеге асырылуда. Оқыту форумдары алғаш рет Қарағанды өңірінде өткізілді.

«AMANAT» партиясы алдағы уақытта да тұрғын үй-коммуналдық шаруашылығы саласындағы реформаларға жүйелі түрде қолдау көрсетуді жалғастырып, сенімге, жауапкершілікке және тұрғындардың шешім қабылдау процесіне нақты араласуына негізделген орнықты басқару моделін қалыптастыруды көздейді.