Сербия Трамптың Украина бойынша жоспарын қолдады

АСТАНА, 23 желтоқсан – Sputnik. Сербия АҚШ президенті Дональд Трамптың Украинадағы қақтығысты реттеу жөніндегі жоспарын және әскери іс-қимылдарды тоқтатуға әкелетін кез келген бастаманы батыл қолдайды, деп мәлімдеді елдің сыртқы істер министрі Марко Джурич.

"Украинадағы бейбітшілік – Еуропа үшін шұғыл мәселе. Еуропа қысым жағдайында тұр және өз күшіне сүйенуге тиіс. Біз АҚШ президенті Дональд Трамптың жоспарын және әскери іс-қимылдарды тоқтатуға әкелетін кез келген өзге бастамаларды толық қолдаймыз", – деді ол Spiegel басылымына берген сұхбатында.

Министр Белградтың Украинадағы қақтығыс бойынша келіссөз өткізуге алаң ұсынуға дайын екенін еске салды.

"Біз – АҚШ-қа, Еуропаға, Ресейге, Қытайға немесе Таяу Шығысқа тікелей ұшуға болатын санаулы астаналардың біріміз. Сонымен қатар, біз сенімді әрі құпиялылықты сақтайтын қабылдаушы тарап ретінде танымалмыз", – деп толықтырды ол.

Бұған дейін АҚШ әкімшілігі Украинадағы жағдайды реттеу жоспарын әзірлеп жатқанын хабарлаған болатын. Кремль Ресейдің келіссөзге ашық екенін және Анкоридж алаңындағы талқылау форматын ұстанып отырғанын мәлімдеді.