Шідерті лиманды суару жүйесінде 500 метрден астам бөгет нығайтылды

Павлодар облысының Шідерті лиманды суару жүйесінде 500 метрден астам бөгет нығайтылған.

— Гидротехникалық құрылыстардың үздіксіз жұмысын қамтамасыз ету және суару жүйесін келесі вегетациялық кезеңге дайындау мақсатында Шідерті лиманды суару жүйесінде ағымдағы жөндеу жұмыстары жүргізіліп жатыр. Аталған жұмыс гидротехникалық құрылыстардың сенімділігін арттыруға және арналардың өткізу қабілетін қалпына келтіруге бағытталған. Бұл алдағы ауыл шаруашылығы маусымдарында суару жүйесінің тиімді пайдаланылуын қамтамасыз етеді, — деп хабарлады «Қазсушар» РМК Павлодар облыстық филиалынан.

Сондай-ақ кәсіпорын қызметкерлері екі ай ішінде ұзындығы 1200 метр су шығару құрылысын тазартқан.

Еске сала кетейік, Биыл Ақкөл-Жайылма лимандарына 115 млн текше метр су жіберілген.