ШҚО да аңшылар сирек кездесетін қара түсті қасқырды атып тастады

Шығыс Қазақстанда жыртқыштардың санын реттеу шаралары аясында аңшылар сирек кездесетін қара түсті меланист-қасқырды атып алды, деп хабарлайды Arasha.kz сайты YK-news.kz-ке сілтеме жасап.

Жергілікті тұрғындар қасқырлар үйіріне шағымданған.

«Шығыс Қазақстанның мал шаруашылығымен айналысатын тұрғындары үй малдарына шабуыл жасаған қасқырлардың үлкен тобын байқаған. Осы үйірдің ішінде бір қара түсті меланист-қасқыр болған. Жыртқыштар үй жануарларына, соның ішінде жылқыларға жиі шабуыл жасаған соң, шаруалар мәселені шешу үшін жергілікті аңшыларға көмек сұрап жүгінген.

Аңшылар үйірді ұзақ уақыт бойы бақылап, нәтижесінде қолайлы орын мен уақытты таңдап, жоғары дәлдіктегі қарудың көмегімен бірнеше қасқырды атып алды. Олардың арасында сирек кездесетін қара қасқыр да бар», - деді «Табиғат» Қазақстан аңшылар мен балық аулаушылар қоғамы» ҚБ басқарма төрағасы Қажым Жұмалиев.

Аңшылардың айтуынша, олар бұрын-соңды мұндай түсті қасқырды кездестірмеген.

«Меланист  бұл генетикалық мутация салдарынан меланин пигментінің жоғарылауынан туындаған, ерекше қоңыр немесе қара түсті жануар. Меланистер өміршең келеді. Мұндай құбылыс қасқырларда, түлкілерде, тиіндерде және көбелектерде байқалған. Қара пантералар жеке түр емес, олар да  меланистер. Мен жер астында тіршілік ететін кеміргіштердің (цокор) және қоян тәрізділер отрядына жататын Алтай шақылдақтарының арасында меланистерді кездестіргенмін. Меланизм  өте сирек құбылыс. Адамдарда меланистер кездеспейді», - деді С. Аманжолов атындағы Шығыс Қазақстан зерттеу университетінің (ШҚУ) профессоры Константин Прокопов.