ШҚО да кәсіпорындарға 1,9 млрд теңге айыппұл салынды

Шығыс Қазақстанда жыл басынан бері экологиялық талаптарды бұзған кәсіпорындарға 2 млрд теңгеге жуық айыппұл салынған.

Мамандардың айтуынша, тексеріс кезінде өнеркәсіп орындары тарапынан бір емес, бірнеше өрескел заңбұзушылық әшкереленген. Бірінің тазалау қондырғысы ескіріп, әрең жұмыс істесе де, кәсіпорын оны ауыстыруға асықпайды. Соның салдарынан ауаға таралатын зиянды қалдық көлемі рұқсат етілген шектен бірнеше есе асып кеткен. Сарапшылардың пайымынша, мұндай немқұрайлық өңірдегі ауа сапасының одан әрі нашарлауына тікелей әсер етеді. Әсіресе облыс орталығы – Өскемендегі экологиялық ахуал ушығып тұр. Билік өкілдері мәселені шешу үшін қандай шара қолданып жатыр?

Өскемен- еліміздегі ауасы ең лас шаһарлардың алғашқы бестігіне жиі еніп жүр. Қазаншұңқырда орналасқан қала үшін экология мәселесі жыл сайын ушығып, тұрғындар да, мамандар да алаңдаулы. Ресми дерекке сүйенсек, қоршаған ортаға жыл сайын 160 мың тоннаға жуық зиянды қалдық бөлінеді. Өнеркәсіп шоғырланған өңір орталығында қоршаған ортаны қорғау саласының мамандары өндіріс орындарын жиі тексеруге мәжбүр. Биылғы жылдың өзінде ғана зауыттар мен кәсіпорындарға 87 рет жоспарлы және жоспардан тыс тексеру жүргізілген.

Аружан Мұсаханова, ШҚО Экология департаментінің баспасөз хатшысы:

- Олар бойынша 68 нұсқама берілді. Барлығы биыл 1 млрд 900 млн теңге сомада 133 айыппұл салынды.

Желсіз тымық күндері қала аспанын тұман торлап қалады. Ондай кездері мамандар ауа құрамына 22 көрсеткіш бойынша талдама жасайды. 10 бекеттен жиналған мәлімет осы зертханада зерделенеді. Мамандар шектік мөлшеден асқан зиянды қалдықтарды бірден анықтайды.

Кәмшат Ахмадиева, кешенді зертхана басшысы:

- Қолайсыз метеорологиялық жағдай кезінде Өскемен қаласында көміртегі оксиді, хлорлы сутек бойынша жоғарғы көрсеткіштер ПДК мөлшері байқалады.

Сарапшылардың айтуынша, ауаның ластануын тек өндіріс орындарынан ғана көру қателік. Бұл тұрғыда жылу электр орталықтары мен қазандықтардың да үлесі біршама. Сондықтан мәселені түбегейлі шешу үшін таза отынға көшу жолын қарастыру керек, - дейді олар.

Дәуле Асанов, сарапшы-эколог:

- Халыққа таза отын немесе орталық жылу берілу керек. Қазір адамдарға учаске кесіп беріп жатыр. Олар пеш жағады. Қала одан әрі ластануда, ірі ауа ластаушы кәсіпорындарға нақты талаптарды қою керек.

Таза отыннан бөлек, автокөлік мәселесі тағы бар. Ресми зерттеулер нәтижесі көрсеткендей, зиянды қалдықтардың 90 пайызы транспорттан шығады. Сондықтан болашақта қала билігі газбен жүретін қоғамдық көліктер алуды жоспарлап отыр.

Авторлары: Эльмира Ахметова, Жігер Бабаханов