ШҚО да жалған диплом жасатқан жаттықтырушы сотталды

Аудандық сотта ҚР Қылмыстық кодекстің 385-бабы (жалған құжаттарды, мөрлерді, бланкілерді дайындау немесе өткізу, көрінеу жалған құжатты пайдалану) бойынша қылмыстық іс қаралды.

Іс материалдарына сәйкес, 2016 жылы ауыл тұрғыны нақты оқымай-ақ, тергеу анықтамаған тұлғадан 700 мың теңгеге «Қазақ спорт және туризм академиясы» КЕАҚ-ның «дене шынықтыру және спорт» мамандығы бойынша бакалавр дәрежесі берілген жалған дипломын сатып алған.

- 2022 жылдың қыркүйегінде Д. жалған дипломды ұсынып, Үлкен Нарын ауданының балалар мен жасөспірімдер спорт мектебіне армрестлинг бойынша жаттықтырушы қызметіне тағайындалған. Ол бұл қызметте 2025 жылдың желтоқсанына дейін жұмыс істеді. Жалған дипломды пайдалану фактісі аудан прокуратурасының тексеруі барысында анықталды, - деп хабарлады ШҚО сотының баспасөз қызметінен.

Сот айыпталушыны 25 айлық есептік көрсеткіш көлемінде айыппұл төлеуге міндеттеді. Үкім әлі заңды күшіне енген жоқ.

Еске салсақ, осыған дейін Абай облысының тұрғыны 600 мың теңгеге дәрігер дипломын сатып алмақ болғаны хабарланған.