ШҚО да жөндеуден кейін жылу қазандығының қуаты артты

Шығыс Қазақстан облысы Алтай ауданында биыл үш жылу қазандығы жөндеуден өтті. Жылу жүйесінде жиі апат болатын. Жаңа Бұқтырма кентінде қысымды көтеретін станция салынды. 

Енді ішкі құбырлар жаңғыртылып жатыр. Серебрянск қаласындағы қазандықтардың да ескі жабдықтары ауыстырылды. 

Үш жыл бұрын Риддердегі жылу электр орталығында болған апат көпшілікке сабақ болған сыңайлы. Себебі жауаптылар жылыту маусымына ерте қамданатын болған. Мысалы, Алтай ауданында соңғы екі маусымда жылу жүйесін жаңғыртуға 1,5 миллард теңге жұмсалды. Серебрянск қаласындағы жылу қазандығы күрделі жөндеуден өтті.

Дмитрий Васильев, Серебрянск қаласындағы жылу қазандығының бастығы:

- Бұрын кішігірім ақау шығып, кестеге сай жұмыс істей алмай қалатын кез көп болды. Сондықтан жөндеу жұмысы нағыз уақытында басталды. Қазір қазандықтар толық қуатында жұмыс істеп тұр.

Жеті мыңға жуық адам тұртын шағын шаһарда әзірге екі қазандық жұмыс істеп тұр. Тағы екеуі резервте. Жаз бойы көмір қоймасы,мұржалар жаңартылды. «Іргедегі Жаңа Бұқтырма кенті де қысқы маусымды тыңғылықты дайындықпен бастады», - дейді мамандар. Бұған дейін арасында жылу қысымы төмендеп, шағым жиілеп келгенелді мекенде енді мәселе шешімін табады. Кентте жылу қуатын артыратын сорғы станциясы салынып, тозығы жеткен құбыр ауыстырылуда. 

Евгений Шарапов, «Тепловодоцентраль» кәсіпорнының бас инженері:

- Мұндағы қазандық қысымға шыдай алмайтын еді. Сондықтан сорғы станциясының салынуын асыға күттік. Оның үстіне құбыр көлемі де үлкейтілді. Осының барлығы жылумен қамту мауысымын апатсыз өкізуге ықпал етеді.

Жауаптылардың сөзінше, атқарылған жөндеу жұмыстары қызмет көрсету сапасына бірден әсер еткен. Оны тұрғындар да байқапты. 

Татьяна Толстова, жаңа бұқтырма кентінің тұрғыны:

- Біз жұмыс барысын үнемі назарда ұстадық.Құбырдың қалай ауыстырылып жатқанын  өз көзімізбен көрдік. Нәтижесі жаман емес, мінеки, рахат, пәтеріміз жып жылы.

Серебянск қаласындағы қазандықты жаңғырту шаралары келесі жылы да жалғасады. Көмір тасымалдайтын желі мен түтін мұржасы қайта салынады. Қазір ол жоба мемлекеттік сараптамадан өтіп жатыр.

Авторлары: Эльмира Ахметова. Жігер Бабаханов