Шымкентте 700 ден астам адам көші қон заңын бұзған

Шымкент қаласында көші-қон саласындағы құқық бұзушылықтарды анықтау және алдын алу мақсатында ауқымды рейдтік-профилактикалық іс-шара қорытындыланды.

Қалалық полиция департаментінің мәліметінше, үш күн ішінде шаһарда көші-қон заңын бұзудың 710 дерегі анықталды.

— Құқық бұзушылардың қатарында шетел азаматтары да, қазақстандықтар да бар. Олардың барлығы заңға сәйкес әкімшілік жауапкершілікке тартылды, — деп мәлімдеді ведомство.

Сондай-ақ рейд кезінде елімізде болу қағидаларын сақтамаған 276 шетел азаматы қабылдау-тарату орнына орналастырылды.

— Сот шешімімен 103 шетел азаматы мен азаматтығы жоқ тұлға ел аумағынан шығарылды. Бұл іс-шаралар қоғамдық тәртіпті қамтамасыз етуге, көші-қон заңнамасын сақтау мен қоғамдық қауіпсіздікті нығайтуға бағытталған, — делінген полиция таратқан ақпаратта.

Бұдан бұрын Қырғызстан азаматтарының Қазақстанда болу ережесі қайта қаралуы мүмкін екенін жазған едік.