Шымкентте Қамқор әлеуметтік жобасы қолға алынды

Шымкентте зейнеткерлер мәдени ошақтар мен спорттық кешендерге тегін кіреді.

Енді қариялар театр, музейлерді қалағанынша аралап, спорттық үйірмелерге қатыса алады. Сала мамандарының айтуы бойынша, әлеуметтік қолдаудың арқасында аға буынның өмір сапасы жақсара бастады. 

Алпысты алқымдаған Мейірбек Байтанов тән саулығын сақтау үшін су спортына жазылды. Енді ол олимпиада резервінің мамандандырылған базасында кәсіби нұсқаушылардан тәлім алып, жүзумен тегін айналысады. Жаттығу түрлері де жас ерекшелігіне қарай тағайындалды. 

Мейірбек Байтанов, зейнеткер:

- Бала кезде шомылғанбыз. Арнайы айналысқан жоқпын. Бірақ қызығушылық болды. Келіп, қатысуға болады дегеннен кейін осында келіп шомылып жатырмыз. Су жылы, рахат.

Бұдан былай қала қарттарынан спорттық кешендермен қатар, театр, музейлерде және хайуанаттар бағында ақы алынбайды. Олардың бос уақытын тиімді өткізу үшін Белсенді ұзақ өмір орталықтарына да жолдама көлемі ұлғайды. Өйткені кәрілікке бой алдырмай, жан мен тән саулығын сақтап жүрген зейнеткерлер саны артып келеді.

Мауия Алданазарова, қалалық Белсенді ұзақ өмір орталығының басшысы:

- Бүгінгі таңда 4 белсенді ұзақ өмір орталығы бар. Төрт ғимаратта орналасқан. Аудан-аудандардан келіп жатыр барлығы. Бесінші ғимаратты осы желтоқсан айына дайындап жатырмыз.

Бой сергітпеген бір күн - ауру шақырады. Мұндағы қариялар йогамен айналысып, еңбек терапиясы арқылы ем алады. Кітап оқып, шығармашылығын дамытады. Кестелі өнердің қыр-сырын меңгеріп, тоқыма тоқиды.

Күләш Сатылғанова, зейнеткер:

- Аяқ ауру. Басқа да аурулар болады ғой енді қария кісілерде. Солардың бәріне әсері мол. Өйткені біз соларды ұмытып, жаттығуымыздың арқасында, дәрігерлердің арқасында, бір-бірімізбен қарым-қатынас, жылы сөздің арқасында керемет жағдайдамыз.

Қалада 100 мыңға жуық зейнеткер бар. Оларға «Қамқор» әлеуметтік жобасы аясында құрмет көрсетіліп, кейінгі жастарға үлгі ету көзделген.

Сәрсен Құранбек, қала әкімінің орынбасары:

- Дәстүрлі қоғамымызда, дәстүрлі отбасында үлкен кісілердің алатын орны қашан да өте зор. Сол кісілер арқылы тұтас буын қалыптасады. Ұрпақ жалғастығы, дәстүр сабақтастығы қамтамасыз етіледі. Осы Оңтүстік басқаға үлгі болсын деп жасап отырғанымызды айтқымыз келеді.

Мамандардың айтуынша, соңғы жылдары қарттар арасында салауатты өмір салтын ұстанушы көп. «Олардың белсенді өмір салтына бейімделуі алпыс жастан кейін жаңа тыныстың ашылатынын дәлелдейді»,- дейді. Сондықтан қоғам өміріне етене араласқан ардагерлерге құрмет мен қолдау арта бермек.

Авторлары: Нұрсұлтан Мұхамеджан, Нұрмахан Мұсатов, Нұрмахан Бекмұратов