Судың қара нарығын жою жөніндегі жол картасы қабылданды

— Түркістан облысында Қарақуыс және Бәйдібек-ата су қоймаларының құрылысы жалғасып жатыр, оларды 2026 жылы аяқтау жоспарланған, бұл шамамен 69 млн текше метр қосымша су жинауға мүмкіндік береді. Ислам даму банкі қарызының бірінші траншы қаражаты есебінен 2026 жылы үш жаңа су қоймасының құрылысы басталып, екі су қоймасын реконструкциялау көзделген. Бір мезгілде оңтүстіктің 5 облысында жалпы ұзындығы 986 км болатын 103 каналды реконструкциялау мен автоматтандыру бойынша 96 жобаны іске асыру басталады, — деді Нұржан Нұржігітов.

Оның айтуынша, қалыптасқан жағдайда су үнемдеу технологияларын белсенді түрде енгізу және ылғалды көп қажет ететін дақылдардың егіс алқаптарын қысқарту қажеттілігі туындап отыр.

— Сонымен қатар Мемлекет басшысының Қазақстан халқына Жолдауын іске асыру жөніндегі Жалпыұлттық жоспар аясында министрлік Бас прокуратурамен бірлесіп судың «қара нарығын» жою жөніндегі Жол картасын қабылдады. Жол картасы аясында министрліктің құқық қорғау және басқа да мемлекеттік органдармен өзара іс-қимылы көзделген. Судың «қара нарығының» тәуекел аймақтары айқындалып, су пайдаланушы мен су тұтынушы арасындағы шарттық қатынастарды цифрландыру басталды, цифрлық және спутниктік мониторинг құралдары енгізіліп жатыр. 2026 жылы судың «қара нарығының» алдын алуға, сондай-ақ су объектілерінде, су қорғау аймақтары мен белдеулерінде заң бұзушылықты болдырмауға бағытталған бақылау және инспекциялық іс-шараларды күшейту жоспарланған. Жол картасында цифрландыруға ерекше мән берілген. Осы жылдың басынан министрлік фермерлермен су беру жөніндегі шарттарды электрондық форматта жасасуға көшу жұмыстары жүзеге асырылып жатыр. Аталған жүйе аграршыларды сумен қамтамасыз етудің толық циклін қамтиды, — деді министр.

Жүйені енгізу деректердегі айырмашылықтарды болдырмауға, әкімшілік үдерістерді оңтайландыруға, адами фактордың әсерін барынша азайтуға, сондай-ақ су ресурстарын бөлу мен су пайдаланғаны үшін есеп айырысудың объективтілігін қамтамасыз етуге мүмкіндік береді. Қазіргі уақытта жүйе штаттық режимде жұмыс істеп тұр. Су тұтынушылармен шарттар жасасу жұмыстары жалғасып жатыр.

Бұдан бұрын хабарланғандай, бүгін Үкімет отырысында Су ресурстары және ирригация министрі Нұржан Нұржігітов өзен бассейндеріндегі су мөлшеріне түсінік берді.