Сүйінші, ағайын! Аймағамбетов бар қазақты қуантатын жаңалығын айтты

Мәжіліс депутаты Асхат Аймағамбетов әлеуметтік желідегі парақшасында Назарбаев Университетіне қатысты қуанышты жаңалық жариялады, деп хабарлайды Arasha.kz.

Аймағамбетовтің айтуынша, Назарбаев Университеті (NU) беделді Times Higher Education (THE) әлемдік рейтингісінде бірден 100 орынға жоғарылап, әлемнің үздік 401–500 университеті қатарына енген.

«Бұл — жылдар бойғы табанды еңбектің және ұжымдық күш-жігердің жемісі. Барша оқытушыларды, зерттеушілерді, студенттер мен түлектерді осы тарихи жетістікпен шын жүректен құттықтаймын!» — деп жазды депутат.

Асхат Аймағамбетовтың сөзінше, THE рейтингі — әлемдегі ең беделді және сараптамалық университеттік рейтингтердің бірі. Ал Назарбаев Университеті бүгінде еліміздегі классикалық әрі қуатты зерттеу университеті ретінде халықаралық талаптарға толық сай келеді.

«NU — академиялық еркіндігімен, ғылыми әлеуетімен және жоғары деңгейдегі профессорлық-оқытушылық құрамымен ерекшеленетін бірегей оқу орны», — деді ол.

Сонымен бірге депутат университеттің қаржыландыру деңгейіне алаңдаушылық білдірді.

«Мұндай университеттер — шығын көзі емес, елдің болашағына бағытталған инвестиция. Сондықтан нақты қолдау мен тұрақты саясат қажет», — деп атап өтті Аймағамбетов.