Т. Әсемқұловтың еңбегі алғаш рет түрік тілінде жарық көрді

Анкарада атақты күйші, жазушы, этнограф Таласбек Әсемқұловтың «Тал-түс» шығармасы алғаш рет түрік тілінде шықты. Еңбекті аударуға «Көкту» қазақ мәдени қоғамы ұйытқы болды.

Іс-шараға автордың жұбайы, мәдениеттанушы Зира Наурызбай Елордадан арнайы барып қатысты. Жиында Анкарадағы қазақ және түрік ғалымдары, қазақ мәдениеті мен әдебиетіне қызығушылық танытқан жастар бас қосты. Таласбек Әсемқұлов бұл туындысында өткен ғасырдағы қазақ қоғамының тұрмыс-тіршілігін, ашаршылық кезеңінің ауыртпалығын суреттейді. Шығармада ұлттық құндылықтар мен,.. күй өнерінің терең мазмұны көрініс тапқан. «Тал-түс» бұған дейін БҰҰ-ның ресми алты тіліне аударылды. Орыс тіліне тәржімалаған қаламгердің жұбайы – Зира Наурызбай. Оның айтуынша, бұл жазушының көзі тірісінде жарық көрген жалғыз роман. Өмірден өткеннен кейін қаламгердің сегіз томдық шығармалар жинағы оқырманға жол тартып, оның киносценарийі негізінде екі фильм түсірілді.

Зира Наурызбай, Т. Әсемқұловтың жұбайы, мәдениеттанушы:

- Мынау роман оның автобиографиялық романы деуге болады. Бала кезі, жас кезі, өзінің ұстаздары туралы. Бірақ сол арқылы қазақтың 20 ғасырдағы трагедиясы ашылады. Өйткені әрбір күйдің өзінің тарихы болады ғой. Сосын көне тарих та қозғалады осы күйлері арқылы. Осы ғана романы көзі тірісінде өзі көрген жалғыз кітап осы роман еді. Сосын қайтыс болғаннан кейін шәкірттерімен бірге мен оның шерткен күйлерін жинақтап, диск, сиди альбом шығардық.

Торғын Сұлтанқызы, аудармашы, журналист:

- Таласбек ағаның атасының күй тартып отырғанын елестетіп, өзіңіз күйдің әуенімен қалқып кетуіңіз де мүмкін. Сосын келесі беттерде соғыстың қиын жағдайларын кешіп жатқан қазақтың отбасыларын көріп, олармен бірге қиналасыз. Артынан жас Таласбектің, оқушы Таласбектің балғын сезімге, махаббат сезіміне, сүйіспеншілік сезіміне өзіңіз де бөленіп, кейде жылап та аласыз. Сондықтан бұл кітаптың мағынасы терең мен үшін де, қазақ үшін де. Енді түрік жұртына да терең болады деп ойлаймын.