Таразда әлеуметтік желідегі жазбалар арқылы бопсалаған үш адам сотталды

Блогер Абай «Сократ» Жүндібаев өзінің Facebook парақшасында түрлі мемлекеттік органдарды сынап, сыбайлас жемқорлыққа шағымданатын жазбаларды үнемі жариялап отырады. Өткен жылы «Тараз Арена» спорт сарайы да блогердің назарына ілікті. Бірақ ол жазбаға өз жерлестерінің немесе жоғары лауазымды тұлғалардың реакциясын күтпестен спорт сарайының директоры Жанат Бабаевты бопсалау арқылы «ақша табуға» шешім қабылдады.

Ол бұл іске тағы екі адамды тартты. Олар ақшаны алып, Жүндібаевқа қауіпсіз жағдайда тапсыруы тиіс болған. Блогер спорт кешенін сынаған жазбасын өшіргені үшін 2,5 миллион теңге талап еткен. Сондай-ақ, алдағы уақытта бұл ақпараттың таралмауы үшін бір қызметкерді жұмыстан шығарып, керісінше, басқа бір әйелді жұмысқа қайта алуды талап еткен. Спорт кешенінің директоры барлық шарттармен келісіп, талап етілген соманы төлеп, үстеме ретінде екі жылдық абонемент берген.

Сот отырысында блогер өз кінәсін толық мойындап, соттан бас бостандығынан айырудан басқа жаза тағайындауды сұрады. Оның сыбайластары кінәларын мойындамай, соттан өздерін ақтауды сұрады.

Қылмыстық кодекстің 194-бабының 2-бөлігімен (Қорқытып алу) жаза ретінде мүлкі тәркіленіп, бас бостандығын шектеу немесе 3 жылдан 7 жылға дейінгі мерзімге бас бостандығынан айыру жазасы қарастырылған. Прокурор айыпталушыларды 4,5 жылға бас бостандығынан айыруды сұрады.

Судья бопсалауға қатысушылардың үшеуін де кінәлі деп тапты. Абай Жүндібаевқа үш жылға бас бостандығынан айыру жазасы тағайындалды. Сондай-ақ екі сыбайласы да үш жылға сотталды.

Еске салайық, Ақтөбеде ауыл тұрғынын бопсалаған үш күдікті қамалды. Күдіктілер жәбірленушіден 2 млн теңге талап еткен.