Таразда жаңа шағын аудан салынып жатыр

Таразда жыл басынан бері 216 мың шаршы метр баспана пайдалануға берілген.

Бұл көрсеткіш жыл соңына дейін тағы артады. Қазір қалада «Балауса» шағын ауданның құрылысы жүріп жатыр. Оған қоса «Ұлы Дала» мен «Шапағат» шағын аудандарында да үйлер салынуда. Көпқабатты баспаналардың құрылысымен қала әкімі танысып қайтты.

Қаланың шығыс бөлігінде бой көтеретін «Балауса» шағын ауданында қазір көпқабатты 22 үйдің құрылысы жүріп жатыр. Бес жақын арада қолданысқа берілсе, қалғаны жыл соңына дейін пәтер кезегінде тұрғандарға табысталады. Шағын аудан аумағы абаттандырылып, балалар алаңдары салынады.

Бақытжан Орынбеков, қала әкімі:

- Қасбеті жаңа заманауи материалдармен қапталған. Әр пәтерге қосымша жер төледі. 5-6 шаршыны құрайтын арнайы «кладовая» жобада қарастырылды. Барлық үйде мүмкіндігі шектеулі азаматтар үшін арнайы жедел саты жобада қарастырылып, орнатылып жатыр.

Жаңа ауданда үйлер жаңа стильде бой көтеріп келеді. Қасбеттері түрлі түсті, бөлмелері әдеттегіден кең. Жалпы бір көпқабатты үйде 40 пәтер болады.

Александр Черных, Мердігер компанияның бас инженері:

- Әр үйде төрт бөлмелі 10, үш бөлмелі 10 және екі бөлмелі 20 пәтер орналасқан. Подьездегі әр қабатта 2 ғана пәтерден болады. Үйдің іргесі монолитті, тіректері арматурамен күшейтілген. Қабырғаларын суық өткізбейтін арнайы құрылыс материалмен жылыттық.

«Балауса» шағын ауданында бас аяғы 145 үй болады. Олардың 64-і таунхаус стилінде. Жалпы 14 мыңнан аса адам қоныстанатын шағын ауданда мектеп, аурухана, спорт кешені сияқты әлеуметтік нысандар салынады.

Авторлары: Мерей Бает, Тимур Сейілхан, Елдар Байділдә