Тоқаев Жоғары кеңесте қандай мәселелер қаралатынын айтты

АСТАНА, 29 мамыр – Sputnik. Қасым-Жомарт Тоқаев Жоғары Еуразиялық экономикалық кеңестің шағын құрамдағы кездесуінде қаралатын мәселелер жайында айтты, деп хабарлайды Sputnik Қазақстан.

Отырыстың басында мемлекет басшысы бүгінгі күннің символикалық мәніне назар аударды. Дәл осы күні, яғни, 2014 жылдың 29 мамырында Қазақстан елордасында Еуразиялық экономикалық одақ туралы шартқа қол қойылған болатын.

"Бұл уақиға еуразиялық интеграцияның маңызды кезеңі ретінде есте қалды. Одақ құрылған сәттен бері еуразиялық "бестіктің" басты ынтымақтастық алаңына айналды. Осыған орай барша әріптесімді Еуразиялық экономикалық одақ күнімен құттықтауға рұқсат етіңіздер. Бірлестік одан әрі дамып, елдеріміз бен халықтарымыздың игілігіне қызмет ете берсін!", - деді Тоқаев.

Ал бүгінгі шағын форматтағы кездесу барысында бірқатар маңызды мәселелер қаралады.

"Біз сыртқы саудаға, жасанды интеллектіні дамыту бастамаларына қатысты маңызды мәселелерді талқылаймыз. Бұл туралы мазмұнды әңгімеміз кеше экономикалық форум аясында басталды. Жиынымыз әдеттегідей конструктивті сипатта өтіп, өзара тиімді шешімдер қабылданатынына сенімдімін", – деді президент.