Трамп: АҚШ Гренландиядан бас тартпайды

АҚШ Гренландияны Ресей немесе Қытайдың ықпалына бермеу үшін оны бақылауға алуды көздейді. Бұл туралы Дональд Трамп мәлімдеді.

Оның айтуынша, арал АҚШ-тың ұлттық қауіпсіздігі үшін стратегиялық маңызға ие. Әскери базаларды жай ғана жалға алу өңір қауіпсіздігін толық қамтамасыз етуге енді жеткіліксіз. Сондықтан Ақ үй басшысы Даниямен ерікті келісімге келу мүмкін болмаса, «басқаша жолмен» әрекет етуі мүмкін екенін айтты. Қазір Ақ үйде аралды АҚШ құрамына қосу жолдары, соның ішінде күш қолдану нұсқасы да талқыланып жатыр. Дания бұл мәлімдемелерді жол берілмейтін қысым деп бағалады. Елдің премьер-министрі Гренландияның АҚШ-қа қосылуы НАТО-ның ыдырауына әкелуі мүмкін екенін ескертті. Келесі аптада екі ел өкілдері арасында келіссөздер өтуі тиіс.