Трамп Пентагонға Африкадағы бір елде әскери операцияға дайындалуды тапсырды

АҚШ президенті Дональд Трамп соғыс министрлігіне Нигерияда ықтимал әскери қимылдарға дайындалуды тапсырды. Пентагон басшысы елдің әскери күштері мен техникалары осындай операцияға әзірленіп жатқанын растады, деп хабарлайды Arasha.kz.

Дональд Трамп өзінің Truth Social әлеуметтік желісіндегі жазбасында, егер Нигериядағы террористер христиандарды өлтіруді жалғастырса, АҚШ бұл елге қарсы әскери әрекетке баруы мүмкін екенін мәлімдеді.

«Егер Нигерия үкіметі христиандардың қырылуына жол беруді жалғастырса, АҚШ бұл елге көрсетіп отырған барлық көмекті дереу тоқтатады және исламдық террористерді толық жою үшін осы атақтан айырылған елге әскермен кіруі әбден мүмкін», — деп жазды Ақ үй басшысы.

Америка президенттің айтуынша, егер АҚШ шабуыл жасаса, ол «тез, қатаң әрі нақты» болады.

Пентагон басшысы Пит Хегсет Х әлеуметтік желісінде Дональд Трамптың бұйрығына пікір білдірді.

«Иә, мырза. Нигерияда және әлемнің кез келген жерінде жазықсыз христиандардың қырылуы дереу тоқтатылуы тиіс. Соғыс министрлігі әрекетке дайындалуда. Немесе Нигерия үкіметі христиандарды қорғайды, немесе біз бұл сұмдықтарды жасап жатқан ислам террористерін жоямыз», — деді министр.

Еске салайық, бұған дейін АҚШ Венесуэлада ықтимал соққы бағытталатын нысандарды анықтаған еді — олардың қатарында әскери объектілер, әуежайлар және есірткі айналымы үшін пайдаланылатын порттар бар.

Сондай-ақ БҰҰ Адам құқықтары жөніндегі жоғары комиссары Фолькер Тюрк АҚШ-тың Кариб және Тынық мұхиттарындағы кемелерге әуе соққыларын жасағанын айыптаған болатын.