Түркия балалардың әлеуметтік желілерге қолжетімділігін қатаң реттемек

Бұл туралы елдің отбасы және әлеуметтік қызметтер министрі Махинур Өздемир Гөкташ агенттік ұйымдастырған дөңгелек үстел отырысында мәлімдеді.

Министрдің айтуынша, бастама цифрлық дәуірде отбасы институтын қорғау және балалардың қауіпсіздігін қамтамасыз ету мақсатында қолға алынған. Қазіргі таңда балалардың әлеуметтік желілерді пайдалану жасы 6-ға дейін төмендеген, ал экран алдында өткізетін уақыты тұрақты түрде артып келеді.

– Бір жағынан біз отбасылардың цифрлық сауаттылығын арттыруға тырысамыз. Бірақ балаларды алгоритмдердің, ірі технологиялық компаниялардың және цифрлық платформалардың ықпалында қалдырғымыз келмейді. Бұл құрылымдар балалар арқылы үлкен пайда табады, – деді Махинур Өздемир Гөкташ.

Оның сөзінше, балалар ойын барысында көбіне қару-жарақпен байланысты агрессивті кейіпкерлерді таңдайды және кей жағдайда өзін солармен сәйкестендіреді. Бұл үрдіс алаңдаушылық туғызады.

Жоспарланған өзгерістерге сәйкес, әлеуметтік желі платформалары 15 жасқа дейінгі пайдаланушылар үшін міндетті жас тексеру жүйесін енгізуге тиіс. Сонымен қатар Түркияда 1 миллионнан астам қолданушысы бар платформалар ел аумағында ресми өкіл тағайындауы қажет.

Тағы бір талап – балаларға зиян немесе орынсыз контент бір сағат ішінде жойылуы тиіс. Бұдан бөлек, жаңартылатын заңнамаға алғаш рет ойын платформалары енгізіледі. Егер олардың аудиториясы 100 мың қолданушыдан асса, олар да Түркияда өкілдік ашуға міндеттеледі.

Министрдің айтуынша, жаңа талаптарды орындамаған компанияларға қатысты санкциялар қарастырылады. Сондай-ақ жалған жарнамаға қарсы күрес күшейтіліп, ата-аналық бақылау құралдары жетілдіріледі.

Махинур Өздемир Гөкташ бұл бастаманың басты мақсаты шектеу қою емес, қауіпсіз цифрлық орта қалыптастыру екенін атап өтті.

– Біз балалардың цифрлық кеңістікте еркін әрі қауіпсіз болуын қалаймыз. Сонымен бірге тәуелділіктің алдын алуды көздейміз, – деді министр.

Ол Түркияның бұл бағытта халықаралық тәжірибені ескеріп отырғанын айтты. Атап айтқанда, ұқсас шаралар Еуропалық одақ елдерінде, Австралияда, Франция мен Испанияда енгізіліп жатыр.

Министрдің мәліметінше, Түркия жақында балаларды цифрлық ортада қорғау мәселесіне арналған халықаралық саммит өткізіп, ЮНИСЕФ ұйымымен бірлескен декларация қабылдаған.

– Технологиялардың қарқынды дамуы жағдайында бұл мәселені бірде-бір ел жеке шеше алмайды. Сондықтан халықаралық ынтымақтастық аса маңызды, – деді ол.

Айта кетейік, жаңа реттеу тетіктері балалардың цифрлық іздері мен болашақтағы құқықтық тәуекелдерін азайтуға да бағытталған.

Бұған дейін Түркия мектеп қауіпсіздігі үшін жасанды интеллект жүйесін енгізгені мәлім болды.