ҰБТ 2025: емтиханға дайындық курсының бағасы қанша

Орал мен Өскеменде тестке дайындық құны еліміз бойынша ең төмен болып тұр. Мұнда ҰБТ-ға қажетті пәндерді терең меңгеру үшін 25-50 мың теңге төлейді. Оған 5 пән кіреді. Оның үшеуі міндетті пәндер болса, қалған екеуі мамандыққа байланысты таңдалғаны. Оқу орталықтарының кейбірінде баға одан жоғары. Сонымен бірге Орал қаласында бір сағаттық дайындық курсының құны 4 000-7 000 теңге болса, Өскеменде қызметтің бұл түрі – 2 000-3 000 теңге. 

Семей мен Қостанайда баға сәл жоғары. Мұнда топ болып дайындалу құны – 25-50 мың теңге. Қосымша дайындалу үшін академиялық сағатқа 1 800-2 500 теңге сұрайды. Репетиторлар үйге келіп оқытса 1 500-10 000 теңге төлейсіз. Көбіне баға – 2 500-4 000 теңге аралығында. Кей орталықтарда баға жоғары. Рудный қаласында ҰБТ-ға дайындық курсының құны – 80-100 мың теңге.

Ақтөбе, Түркістан, Қонаев пен Атырауда баға өзге өңірлерге қарағанда орташа. Офлайн сабақ оқу, тестке дайындалу үшін шамамен 30-60 мың теңге керек. Ал жеке курс алсаңыз 2 000-6 000 теңге төлейсіз.

Тараз, Қарағанды мен Жезқазғанда дайындық курсының бағасы сәл жоғары. Онлайн мектептер ай сайын 40-70 мың теңге сұрайды. Ал офлайн дайындық курсының бағасы 65-100 мың теңге аралығында. Үш пәнге дайындалу үшін аптасына үш күн курсқа қатысады. Тараз қаласында өзге де ұсыныстарды қарауға болады. Жеке репетитор сағатына 3 000-10 000 теңге алады.

Қызылорда, Павлодар мен Шымкентте ҰБТ-ға дайындық курсының құны айына 50 мың теңгеден басталады. Оқу орталықтарының көбінде баға – 80 000 теңге. Егер тек бір пәннен ғана дайындалуды ұйғарсаңыз айына 15-20 мың теңге керек. Бұл өңірлерде репетиторлар орта есеппен 2 000-4 000 теңге сұрайды. Оңтүстікке қарағанда Павлодарда қызметтің бұл түрі екі есе арзан.

Ақтау, Талдықорған, Петропавлда ҰБТ-ға дайындық курсының ең төмені 60 мың теңге болып тұр. Ақтау қаласында тестке үйде отырып дайындалған кезде репетитор сағатына 2 000 – 3 500 теңге алады. Петропавлда – 4 000-6 000, Талдықорғанда – 4 000-5 000 теңге. Таңдау пәніне қарағанда міндетті пән мұғалімдерінің дайындық курсына 10-20% қымбат болып келеді.

Алматы, Астана мен Көкшетауда ҰБТ-ға дайындалу курсының бағасы жоғары. Алматы қаласында курстың ең арзаны айына – 60-90 мың теңге аралығанда. Жеке дара оқыту курсының құны сағатына 4 000 теңгеден басталады. Қазір бос педагогті табу қиын. Көбінің кестесі тығыз, олардың бәрі бір жылдық дайындық жоспарын бекітіп қойған.

Астанада бес пәнге арналған офлайн курсты 100 мың теңгеге ұсынады. Ал төрт пәннен тұратын онлайн дайындық құны – 75 мың теңге. Астаналық репетиторлар сағатына 3 000 – 5 000 теңге алады. 

Еліміз бойынша ҰБТ-ға дайындық курсы Көкшетау қаласында жоғары. Бес пәнге ай сайын 80-120 мың теңге керек. Ал егер аптасына бес күн қатар дайындық өткізсе, курс құны 140 мың теңгеден жоғары болады. Есесіне аралық тестке дайындайды, қатемен жұмыс істейді, шешуі қиын сұрақтарға басымдық береді. Орталық ішінде бір пәнге дайындау құны – 35 мың теңгеден жоғары. Ал жеке репетиторлар сағатына 4 000–6 000 теңге сұрайды. 

Бұған дейін Қазақстандағы ЖОО-лардың оқу ақысы туралы жазылды.