Үйден қашып кетіп, жертөледе тұрдым : әнші Қайрат Нұртас өткен өмірін еске алды (видео)

Әнші Қайрат Нұртас өнер жолына қадам басқан кезін еске алды, – деп хабарлайды Aikyn.kz.

Ол студент кезде шығармашылыққа ден қойып, көптеген ән жазғанын айтты. Сонымен қатар өзін танымал еткен «Арман» әні қалай жазылғанын еске алды. Айтуынша, әні кең таралып, тыңдарманның ыстық ықыласына бөленсе де, әншінің өзін алғашында ешкім танымаған.

«Әншілікті балабақшадан, үш жасымнан бастаған болатынмын. Анам анда-мұнда көп алып жүрді. Жасым кіші болғандықтан ба, көптеген ән жаздырдым. 14-15 жасқа дейін. 17 жасқа келгенімде әкемнен «Бізге ақша берші, бір ән жаздыртып, жарыққа шығарсақ» дедім. Әкем берді. Ол кезде 1 500 доллар деген көп ақша еді. Бауыржан Есебаев ағамыздың «Таңғы елес» және «Арман» деген екі әні болды. Мен «Арман» әнін таңдадым. Студияға келдім. Арман Бексұлтанов ағамыз, «Атың, тегің кім?» деп сұрады. Қайрат Айдарбеков дедім. «Әкеңнің аты кім?» деді. Нұртас дедім. «Онда сен бүгіннен бастап Қайрат Нұртассың» деді. Сол кезде өзімді танымал сезіндім. «Арманды» жазған кезде мейрамханада жұмыс істеп жүрдім. Әнім қатты тарай бастады. Бірақ менің өзімді ешкім танымайды. Бірі «Жігіттер квартеті орындап жүр» десе, енді бірі Нұржан Қалжан, енді Асқар Жүнісбеков орындайды дейді. Сөйтіп маған бейнебаян түсіру керек болды. Тағы әкеме барып, үш жарым доллардай алып, бейнебаян түсірдік. Дискіміз жақсы таралды.  Әнім танымал  бола бастаған кезде колледжде оқитын едім. Үйім бар, бірақ қызық үшін достарыммен жатақханада жүретінмін. Үйден қашып кете беретінмін. Солармен жертөледе тұратынбыз. Бір күні «Барахолкаға» бардым, қалтамда үш мың теңге бар. Барсам, барлық жерде менің әнім қойылып тұр. Дискі сататын жерге барып, «Мынаны мен айтамын ғой» дедім. «Кетші бар, сен кімсің» деп айтқан. Барлық жерде әнім қойылған, бірақ мені ешкім танымады. Бір күні автобуста мінейін деп тұрғанда қасымдағы дискі сататын бутикте менің әнім қойылып тұр екен. Басымды сұғып, «Мына әнді мен айтамын ғой» дедім. «Иә, сенсің ғой» деп таңғалды сатушы. Сол сәт менің бақытты кезім болды», - дейді әнші. 

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.