Украинадағы қақтығысты тезірек тоқтату қажет Чехия премьері

АСТАНА, 8 ақпан – Sputnik. Украинадағы қақтығыс басталғаннан кейін көп ұзамай бейбіт келісім жасауға мүмкіндік болды, алайда сыртқы араласудың салдарынан бұл жүзеге аспады, деп есептейді Чехияның премьер-министрі Андрей Бабиш.

"Тараптар 2022 жылдың сәуір айында-ақ келісім (бейбітшілік туралы — ред.) жасауға жақын еді, бірақ кейін Борис Джонсон (Ұлыбританияның бұрынғы премьер-министрі — ред.) бой көрсетті… ол жерде қақтығыстың жалғасуына мүдделілер болды", — деді Бабиш TN.cz басылымына берген сұхбатында.

Оның айтуынша, Украинадағы қақтығысты тоқтату қажет, өйткені онда адамдар қаза тауып жатыр. Сондай-ақ Бабиш қазіргі уақытта жүріп жатқан келіссөз барысында осы қақтығысты шешетін жол табылуға тиіс деген пікір білдірді.

"Әрине, бұл дипломатиялық шешім болуы керек", — деді ол.

Бабиштің пікірінше АҚШ президенті Дональд Трампсыз Еуропалық одақ жағдайды реттеуге ықпал ете алмайды. Сонымен қатар, келіссөзге Еуропа тарапынан да "ірі ойыншылар" — мысалы, Германия канцлері Фридрих Мерц, Ұлыбритания премьер-министрі Кир Стармер немесе Италия премьер-министрі Джорджа Мелонидің қосылуы маңызды.

2025 жылдың қаңтарында Словакия премьер-министрі Роберт Фицо Украина бойынша бейбіт келісімге қол қоюға батыс саясаткерлері кедергі келтіргенін мәлімдеген болатын.