Ұлттық банк валюталық операциялардың жаңа ережесін бекітті

АСТАНА, 10 сәуір – Sputnik. Қазақстанның Ұлттық банкі валюталық операциялардың жаңа ережесін бекітті.

Реттеуші валюталық бақылауды күшейтті: банктер операцияларды тексеріп, заңбұзушылықтар туралы хабарлайды. Сондай-ақ шекті сомалар белгіленді: жеке тұлғалар үшін – 10 мың АҚШ долларынан бастап, заңды тұлғалар үшін – 50 мың доллардан бастап.

Сонымен қатар, ережеде мыналар қарастырылған:

бірқатар операция үшін валюталық келісімшарттың есепке алу нөмірі міндетті;

бизнес валюта сатып алу мақсатын растауға тиіс;

капиталды шетелге шығару қаупі бар операцияларды – аударымдар, қарыздар, экономикалық негізі жоқ мәмілелерді бақылау күшейтіледі.

Жеке тұлғалар үшін жеңілдіктер сақталады: 10 мың долларға дейінгі аударымдарға шот ашпауға болады.

Жаңа ереже қаржылық тәртіпті арттыруға, заңсыз қаражат шығарумен күресуге, сондай-ақ валюталық операцияларды цифрландыру мен ашықтығын қамтамасыз етуге бағытталған.

Ереже 2026 жылдың 19 сәуірінен бастап күшіне енеді.