Ұлттық ұланда сарбаз көз жұмды: айыпталушы сотта соңғы сөзін айтты

АСТАНА, 27 қараша - Sputnik. Алматы қаласының 5571 әскери бөлімінде Ұлттық ұланда шақырылғанына небәрі екі ай болған Алмас Шахимов қайтыс болды. Марқұмды жер қойнына тапсырғалы үш жыл болды. Бүгін сотта айыпталушы соңғы сөзін айтты, деп хабарлайды Sputnik Қазақстан тілшісі.

Алмас Шахимовтың өліміне әу баста құмды дауылдан құлаған шатыр себеп болды делінген. Әскерилер тіпті табиғи апат кезінде бірнеше әріптесін құтқарғанын айтып, марқұм сарбазды "Ерлігі үшін" деп марапаттаған.

Алайда марқұмның туыстары әскерилердің сөзіне күмән келтіріп, марапаттан да, ақшалай көмектен де бас тартқан. Олардың айтуынша, баласын ұрып өлтірді. Алмас Шахимовтың туыстары үш жыл бойы әділдік іздеумен жүрген. Биыл 29 мамырда сарбаздың өліміне қатысты алғашқы сот отырысы өтті. Шахимовтың өліміне кінәлі деп взвод командирі Дәурен Байызбеков айыпталды.

© Sputnik / Айдана ДайыроваҰлттық ұланда сарбаз қайтыс болды: айыпталушы сотта соңғы сөзін айтты

Ұлттық ұланда сарбаз қайтыс болды: айыпталушы сотта соңғы сөзін айтты

© Sputnik / Айдана Дайырова

Іс Қылмыстық кодекстің 453-бабы 2-бөлігі - "Қызметке салғырт қарау" бойынша қозғалды. Сотқа жәбірленуші тарап қатыспады.

Бүгін айыпталушы взвод командирі Дәурен Байызбеков соңғы сөзін айтты.

"Алмас менің жүрегімде мәңгі қалады. Ол өте тәртіпті, елгезек сарбаз болатын. Дауыл болған оқиға күні барлық куәгер түсініктеме берді. Алмас бір үйдің жалғызы, мен туыстарының жандүниесін түсінемін, кешірім де сұраймын. Бірақ мен 20 жыл қызметімде бір де бір жауапқа тартылмаған маманмын. Сарбазды өлтірді деген айыппен еш келіспеймін. Осы уақытқа дейін менің жан даусымды есту үшін туыстары сотқа қатысса деп ем, олар қатыспады", - дейді айыпталушы.

Сол күні қатты дауылдан бірнеше сарбаз зардап шеккен. Ол күні ұшқан темір, кірпіш, тас бәрін есеңгіретіп тастағанын айтқан айыпталушы "қандай үкім шықса да, бір Аллаға тапсырдым" деді. Сотталушы командир 4 баласы барын, тергеу ісінің дұрыс жүрмегенін айтты.

© Sputnik / Айдана ДайыроваҰлттық ұланда сарбаз қайтыс болды: айыпталушы сотта соңғы сөзін айтты

Ұлттық ұланда сарбаз қайтыс болды: айыпталушы сотта соңғы сөзін айтты

© Sputnik / Айдана Дайырова

"Мені жауыз етіп көрсетудің қажеті жоқ. Мен Алмастың ата-анасын түсінемін, бірақ мен кінәлі емеспін. Ауылдан шыққан қарапайым адаммын, отбасымның ауыр жағдайын ауызбен айтып жеткізе алмаймын. Иә, Алмас қайтыс болды, мен тірімін, айыбым сол ғана. Қандай үкім шықса да, ата-анасы кешірмейтінін білемін", - дейді сотталушы.

Еске сала кетейік, Алмас Шахимов 2022 жылдың 9 тамызында, Ұлттық гвардияның 5571 бөліміне шақырылғанна кейін екі айдан соң көз жұмды. 2023 жылдың желтоқсанында денені эксгумациялау жүргізілді. Марқұмның анасы Индира Туғанбаева айтуынша, ұлының денесінде бірнеше пышақ жарақаты болған.

"Оң жақта үш пышақ жарақаты табылды: қолда, тізеде және аяқта. Тұншықтырған белгілері бар, сондай-ақ 26 дене жарақаты. Оның бүйрегіне зақым келген, бас сүйегі сынған, денесіне темекі басқан", - дейді Индира Туғанбаева.

Бүгін сотталушының соңғы сөзі тыңдалды.

Резонанс тудырған қылмыстық іс бойынша үкім осы жылдың желтоқсанында шығады.