Ұлы Отан соғысындағы жеңіске 81 жыл толды

АСТАНА, 9 мамыр – Sputnik. Осыдан тура 81 жыл бұрын төрт жылға созылған Ұлы Отан соғысы аяқталып, Германияның капитуляциясы туралы акт рәсімделді.

Қазақстандықтардың ерлігі ұмытылмайды

Ұлы Отан соғысы кезінде қан майданға қазақ жерінен 1,5 миллионға тарта адам аттанған. Қолына қару алған әрбір екінші отандасымыз Жеңіс үшін жанын пида етті. 600 мыңнан астамы отанына оралған жоқ.

Қазақстанда барлығы 12 атқыштар дивизиясы, 7 атқыштар бригадасы, 4 атты әскер дивизиясы және қарулы күштер мен әскер түрлерінің әр саладағы жеке полктері мен батальондары жасақталды. Олар Мәскеу мен Ленинградты қорғап, Украина мен Беларусь, Балтық маңы мен Молдованы азат етуге атсалысты, Берлин шабуылына қатысты.

Соғыста көрсеткен ерлігі үшін мыңдаған қазақстандық медаль және орденмен марапатталды. 500-ге жуығы Кеңес одағының батыры атағына ие болса, төртеуі екі рет батыр атанды. 110 қазақстандық үш дәрежелі Даңқ орденімен марапатталды.

Ардагерлер бір жылда екі есеге азайды

2026 жылдың мамырдағы мәліметке сәйкес, Қазақстанда 57 ардагер қалды. Олардың орташа жасы – 101, ал ең үлкені 105 жасқа келген.

Өкінішке қарай, жыл сайын соғыс ардагерлерінің қатары сиреп келеді. Былтыр 8 мамырдағы жағдай бойынша ҰОС ардагерлерінің саны 105 адам болған.

Халық Қаһарманы атағы берілді

Биыл Ұлы Отан соғысының тағы бір ардагері - Кенжебай Мәденовке "Халық қаһарманы" атағы берілді. Ардагердің өзі 1974 жылы дүниеден өткен. Ал атақ оның туыстарына Ақордада салтанатты түрде табысталды.

Бұған дейін осы марапат Бауыржан Момышұлының туыстарына тапсырылған болатын.

"Халық қаһарманы" атағын Орал қаласында тұратын Иван Гапич те алған. Биыл ол 103 жасқа келді. Sputnik Қазақстан тілшісіне берген сұхбатында Иван Степанович ұзақ өмір сүру құпиясын айтып берген.

Жеңіс күніне арналған төлемдер: Қазақстан көш бастап тұр

Қазақстанда Жеңіс күніне орай 32,9 мың адамға біржолғы төлем берілді. Олардың ішінде ардагерлер, тыл еңбеккерлері, қаза болған және жарақат алғандардың жесірлері бар. Барлығына 3,3 млрд теңгеден астам қаражат бөлінді.

Мәселен, ҰОС ардагерінің әрбіреуіне 5 млн теңге көлемінде біржолғы төлем аударылды. Ал оның сомасы Өзбекстан, Беларусь пен Ресеймен салыстырғанда әлдеқайда жоғары болып тұр.

Өзбекстанда 30 млн сом (шамамен 1,1 млн теңге);

Беларусьта 5 мың беларусь рублі (орташа есеппен 715-825 мың теңге);

Ресейде 10 мың рубльден (шамамен 61 мың тенгеден) бөлек аймақтық төлемдер қарастырылған. Мәселен, Мәскеу мен Мәскеу облысында 70 мың рубльге (орташа есеппен 430 мың тенгеге) дейін беріледі.

Батырларға тағзым

Биыл дәстүр бойынша Алматыда "Мәңгілік даңқ" шеруі өтеді. Іс-шара өтетін жер – Гоголь көшесіндегі орталық мәдениет және демалыс саябағы. Сол жерде "Жеңіс лентасы" және Қазақстанның мемлекеттік тулары таратылады.

Қатысам деушілер сағат 8.30-дан бастап жинала берсе болады. Ал сағат 10.00-де шеру 28 гвардияшы-панфиловшылар саябағынан басталады.

"Мәңгілік алау жанында бүкіл адамзатты ХХ ғасырда фашизмнен құтқарған әкелеріміздің, аталарымыздың, аналарымыздың, әжелеріміздің ерлігіне тағзым етіп, гүл шоқтарын қоямыз", - дейді Ауғанстан соғыс ардагерлері мен мүгедектері қоғамдық бірлестіктері үйлестіру кеңесінің басшысы Мұрат Әбдішкүров.

Шерудің мақсаты – балалар мен болашақ ұрпақ үшін халықтың тарихи-батырлық мұрасын сақтау.

Мамырда неше күн демаламыз

Осы айда бірнеше маңызды мейрам бар. Олар:

1 мамыр – Қазақстан халқының бірлігі күні;

7 мамыр – Отан қорғаушы күні;

9 мамыр – Жеңіс күні;

27 мамыр – Құрбан айт.

Биыл Жеңіс күні сенбіге түсіп тұр. Сондықтан дүйсенбі, 11 мамырда қосымша демалыс беріледі.

Жалпы, мамыр айында бес күндік жұмыс аптасымен істейтін қазақстандықтар сенбі-жексенбі мен мереке күндерін қоса алғанда 14 күн демалады. Ал алты күн жұмыс аптасында барлығы 9 күн демалыс болады.