Ұлыбритания Газаны қалпына келтіру жөнінде халықаралық конференция өткізеді

Report агенттігінің хабарлауынша, бұл туралы Ұлыбритания премьер-министрі Кейр Стармер кеңсесінің мәлімдемесінде айтылған.

— Ұлыбритания анклавты қалпына келтіру және қайта құру бойынша үш күндік конференция өткізу арқылы Газадағы бейбітшілік жоспарының келесі кезеңінде жетекші рөл атқарады. Конференцияға Германия, Италия, Сауд Арабиясы, Иордания және Палестина ұлттық билігі сияқты бірнеше халықаралық серіктестер, сондай-ақ жеке сектор мен халықаралық дамуды қаржыландыру бағдарламаларының, соның ішінде Еуропалық қайта құру және даму банкі мен Дүниежүзілік банк өкілдері қатысады, — делінген хабарламада.

Стармер кеңсесі іс-шараның соғыстан кейінгі Газаны реттеуге арналатынын айтты.

— Сонымен өатар талқылаулар Палестина ұлттық билігінің трансформациясын қолдауға бағытталған күш-жігерді де қозғайды. Қайта құру процесін палестиналықтар басқарады, ал радикалды ХАМАС қозғалысы Газаның болашақтағы басқаруында ешқандай рөл атқармайды, — деп қосты Стармер кеңсесі.

Бұған қоса, британ билігі осы аптада Газадағы қақтығысты шешуге бағытталған күш-жігер аясында Ұлыбритания Сыртқы істер министрі Иветт Купер Лондонда Иорданияның тақ мұрагер ханзадасы Хусейн бин Абдулламен кездесетінін хабарлады.

Еске сала кетейік, Палестинаны мемлекет ретінде мойындаған елдердің қатарында Ұлыбритания да бар.