Ұлытау облысында Цифрлық қауіпсіздік сабақтары форумы өтті

Qazaq24.com, 24.KZ дереккөзінен алынған ақпаратқа сүйене отырып мәлімет бөліседі..

Сәтбаев қаласында «Заң мен тәртіп» қағидатын нығайту бағытында студенттер форумы өтті. Экономикалық тергеп-тексеру департаменті мен «Ұлытау хаб» орталығы ұйымдастырған шарада алаяқтық жобалардан қорғану тәсілдері мен жастардың цифрлық сауаттылығын арттыру жолдары талқыланды.

«Цифрлық қауіпсіздік сабақтары» тақырыбында өткен форумға Жезқазған мен Сәтбаев қаласындағы жоғары оқу орны мен колледждерден 500-ге жуық студент қатысты. Онда жеке қаржыны қауіпсіз басқару, күдікті жағдайлармен бетпе-бет келген кездегі қорғаныс механизмдері туралы айтылды. Құзырлы орган өкілдері «Мұндай басқосулар қаржылық сауаттылықты арттыруға және қылмыстың алдын алуға зор ықпал етеді» дейді. Жалпы жыл басынан бері облыс әкімдігінің қолдауымен осындай форматтағы 60-тан астам кездесу ұйымдастырылған.

Зина Ақылбекова, облыс әкімінің орынбасары:

- Ұлытау облысы Қоғамдық даму басқармасы тарапынан мемлекеттік әлеуметтік тапсырыс шеңберінде қылмыстар мен құқықбұзушылықтардың, оның ішінде алаяқтық, нашақорлық, лудомания және т.б алдын алуға бағытталған іс-шараларды ұйымдастыру бойынша жобасы жүзеге асырылып келе жатыр.

Форумда құқық қорғаушылар жасанды интелектінің дамуы әсерінен пайда болған жаңа цифрлық қауіптер туралы айтты. Соның бірі – дипфейк деп аталады. Яғни компютер көмегімен кез келген адамның көшірмесін жасап, сол арқылы өзгелерді алдайды. Биыл ел бойынша дипфейкке қарсы 40-қа жуық қылмыс тіркелген.

Нұрсұлтан Ибаділдаев, Экономикалық тергеп-тексеру департаментінің Аса маңызды істер жөніндегі тергеушісі:

- Дипфейк дегеніміз қазіргі алаяқтардың ең ұтымды жаңадан әдісі болып табылады. Жастарға біз түсіндірме жұмыстарын жүргіздік. Болашақта өздерінің өмірлеріне және де кәсіби жұмыстарына қолдану арқылы алдын ала профилактикалық іс-шаралар жүргіздік.

Форумның екінші кезеңі онлайн ойын түрінде өтті. Қатысушылар тест түрінде қойылған сандық технологияға қатысты сауалдарға жауап берді. Белсенділік танытып, жеңімпаз атанған жастарға естелік сыйлықтар табысталды.

Авторлары: Елдос Кәкенов, Нұрлан Исмаилов

Оқиғаларды жіберіп алмау үшін Qazaq24.com сайтынан ең өзекті жаңалықтарды қарап отырыңыз.