Ұлытау облысында ұлттық парк жаңа техникалармен толықты

«Ұлытау» Ұлттық табиғи паркі жаңа техникалармен толықты. Ерекше қорғалатын аумақ қызметкерлеріне жол талғамайтын шағын өрт сөндіру кешендері мен жер жыртатын тракторлар берілді.

Мамандардың айтуынша, бұл көліктер инспекторлардың күнделікті жұмысын жеңілдетіп, шалғай аумақтарда табиғатты қорғау шараларын дер кезінде жүргізуге мүмкіндік береді.

«Ұлытау» мемлекеттік ұлттық табиғи паркі 2021 жыл құрылған. Аумағы 59 мың гектар. Оның 15 пайызға жуығы орманмен көмкерілген. Таулы аймақтарда шоқ-шоқ болып шашырай орналасқан жасыл желекті қорғауға бұл техникалар таптырмас құрал. Жол талғамайтын тракторлар мен шағын өрт сөндіру кешендері ең қиын жететін орман учаскелеріне баруға мүмкіндік береді, - дейді орманшылар.

Зейнолла Мамыров, өрт сөндіру техникасының жүргізушісі:

- Ескі техникалар болса, олардың біраз бөлігіне жөндеу жұмысы жасалған. Барлығы бар. Дегенмен жаңаның аты – жаңа. «Горючиге» де үнем болады және бөлшектері, саймандары жоқ дегенде 5 жылға дейін жүріп-тұруға болады ғой.

Ұлттық парк құрылғалы оның материалдық-техникалық базасын нығайту мақсатында 4 жыл ішінде республикалық бюджет есебінен 386 млн теңгеге 20-ға жуық техника сатып алынды. Ал бұл жолғы көліктерді мекеме өз күшімен алып отыр. Лизингтік бағдарлама бойынша рәсімделген техникалардың жалпы құны 272 млн теңге.

Ғалым Қойшыбаев, «Ұлытау» мемлекеттік ұлттық табиғи паркі» РММ директоры:

- Мемлекет басшысының тапсырмасына сәйкес, барлық мекемелерге биылдан бастап алынады. Басқа да Ұлттық парктерге өрт сөндіру техникалары, орманды қорғау техникалары алынып жатыр. Осылай жылдан жылға бұл көбейе береді.

Ұлттық саябақ ұжымы биыл тағы 2 заманауи өрт сөндіру кешенін сатып алуды жоспарлап отыр. Осылайша техникамен жабдықтау 100 пайызға жетеді.

Авторлары: Елдос Кәкенов, Нұрлан Исмаилов