Үнді мұхитындағы қайық апатынан кейін 250 мигрант із түзсіз жоғалып кетті

БҰҰ-ның Босқындар ісі жөніндегі Жоғарғы комиссары басқармасы мен Халықаралық көші-қон ұйымының мәліметіне сүйенсек, із-түзсіз жоғалғандардың қатарында рохинджа мұсылмандары мен Бангладеш азаматтары бар. Алдын ала дерек бойынша, траулер Бангладештен шығып, Малайзияға бет алған. Қатты жел, биік толқын және қайықтың шамадан тыс жүктелуі салдарынан ол аударылып кеткен.

Мәліметке сәйкес, Бангладеш кемесі тоғыз адамды құтқарып қалған. Жағалау күзетінің хабарлауынша, аман қалғандар суға батпау үшін бөшкелер мен ағаш сынықтарына жармасып тұрған.

Мигранттардың басым бөлігі рохинджа этникалық тобына жатады. 2017 жылы Мьянма аумағында наразылықтарды күшпен басу операциясы басталғалы бері жүздеген мың адам елден кетуге мәжбүр болды.

Босқындар лагерлеріндегі ауыр жағдай көптеген рохинджа өкілдерін Малайзияға жетудің жаңа әрі қауіпті жолдарын іздеуге итермелеп отыр. Олар бұл елді өмір сүруге қауіпсіз орын ретінде қарастырады.

Жағалау күзеті өкілінің айтуынша, аман қалғандар сапарға «жақсы өмірге деген үмітпен» шыққандарын айтқан.

Бұған дейін Лампедуза аралы маңынан мигранттар мінген қайық табылып, кемінде 19 адамның қаза тапқаны хабарланған.