ҰҚК Астанадағы мамандандырылған ХҚКО дағы схеманың бетін ашты: ондаған жүргізуші куәлігінің күші жойылды

Астанада жүргізуші куәліктерін заңсыз берумен айналысқан ұйымдасқан қылмыстық топқа қатысты тергеу аяқталды. Тергеуді қала прокуратурасының үйлестіруімен ҰҚК департаменті жүргізген, - деп хабарлайды Tengrinews.kz қадағалаушы органның сайтына сілтеме жасап.

Қылмыстық топтың құрамында мамандандырылған ХҚКО қызметкерлері мен "көмекшілер" аталып кеткен делдалдар болған.

"Сыбайластар өзара міндет бөліскені анықталды: делдалдар ғимарат маңында тұрып, емтихан тапсырушыларға теориялық сұрақтардың жауабын айтып отырған. Ал орталық қызметкерлері олардың практикалық емтиханнан өткені туралы ақпараттық базаға көрінеу жалған мәлімет енгізген", - деп хабарлады прокуратура.

2025 жылы осы жолмен 74 жүргізуші куәлігі берілген. Қазір олардың күші жойылды.

"Күдіктілердің әрекеті Қылмыстық кодекстің екі бабы бойынша сараланды: 262-бап - "Ұйымдасқан топ, қылмыстық ұйым құру және оларға басшылық ету, сол сияқты оларға қатысу" және 206-бап - "Ақпаратты заңсыз жою немесе түрлендіру", - деп мәлімдеді қадағалаушы орган.

Алты күдікті қамауда отыр. Тағы үшеуінен ешқайда кетпеу туралы қолхат алынған, біреуі үйқамақта. Қылмыстық іс мәні бойынша қарау үшін сотқа жолданды.

Бұған дейін ҰҚК Сыбайлас жемқорлыққа қарсы іс-қимыл қызметі жыл басынан бері Астана қаласында, Ақмола және Павлодар облыстарында автомектептердің жұмысы мен жүргізуші куәліктерін рәсімдеу кезінде заңсыз сыйақы алу және қызметтік өкілеттіктерді теріс пайдалану деректерін анықтағанын хабарлаған едік.

Бізді Google-дың негізгі дереккөздер тізіміне қосыңыз