Үш ақынға қарызбын Роза Әлқожа

Нәзік даусымен қаншама тыңдарманның жүрегіне жол тапқан әнші қыздарымыз көп. Сыңғырлаған даусымен ұлттың рухын көтерген Роза Бағланованың, әлемді тамсандырған сахна саңлағы Роза Рымбаеваның дауысына бүкіл ел таңдай қақты. Сол Розалардың бүгінгі жалғасы – Роза Әлқожа. Жақында ақын, сазгер, композитор, әнші елордамызда ерекше форматта шығармашылық кешін өткізді. Жиылған тыңдарман әр әнін қосылып шырқады, енді бірінде көзіне жас алып, өлеңмен сағынышын басқандай тебіренді. Кештің иесі тура он бес өлең оқып, он бес ән орындады. Кеш соңында әншіні әңгімеге тартып, сұхбаттастық.

AIQYN: Қазір жас пен үлкеннің тыңдайтын әндерінде айырма­шылық көзге көрініп тұрады. Сіздің қор­жының­ыздағы әндерді көбіне тыңдайтын ауди­тория кім­дер? Тыңдарман талғамы туралы не айтасыз? 

– Сахнада ән салып келе жатқаныма 25 жыл болыпты. Соңғы 15 жылдан бері гастрольмен жүріп, жылына шамамен 50-60 шақты жеке шығармашылық кеш беремін. Сонда байқаға­ным, кешке келетін қонақтардың ішінде көбіне үлкен кісілер екен. Әндерімнің лирикалық ба­ғыт­та болуы оларға ұнайтын шығар деп ойлай­мын. Жақында өткен «Жүрегім менің» атты кештің афишасында мелика мен лирикалық ба­ғыт екені көрсетілді. Мелика гректердегі ырғақ­ты поэзия, ал лирика – біздің бағытымыз. Сон­дықтан сол шығармашылық кеш – тура осындай адамның ішкі сезімдерін жария ететін, ешкімге айтылмайтын күйді көрсететін өте нәзік, мұңға, сырға толы кеш. Тыңдармандарым әнімді өте жақсы біледі, тіпті өздері де қосылып айтып отырады. Өздерінің жақсы көретін әндерін, мысалы «Мен сыйға тартқан орамал», «Мен сені сүйем, өмір», «Жүрек назы» сияқты ән­дерімді күтіп отырады. Мұндай әндердің де ғұмыры тыңдарман ықыласымен бірге ұзарып келе жатыр. 

AIQYN: «Қинайды Фаризаның аманаты» деген өлең жолдарының мазмұнына үңілсек...        

– Өзімді үш ақынға қарыздар санаймын. Оны сахнада да айтып жүрмін. Біреуі – Мұхтар Шаханов. Оның өлеңдерінен өрелікті, махаб­батқа, достыққа адалдықты үйрендік. Бірде «Аға, сіз бізді өлеңдеріңізбен тәрбиелеп едіңіз. Махаб­бат та, достық та сіз айтқандай емес екен ғой» деп едім өзіне. Жүзіме қарап күлімдеп қойды. Екінші – Фариза Оңғарсынова. Қазақ қыз­дарының болмысын, қайсарлығын, ибалығын Фариза апамыздың өлеңдерінен бойымызға сіңірдік. Үшіншісі – Төлеген Айбергенов. Ол менің – сүйікті ақыным. Біз соларды оқып өстік. 

Сұхбаттың толық мәтінін мына сілтемеден оқи аласыз

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз