Вашингтон штатында тұрғындар көшірілді

АҚШ-тың Вашингтон штатында 10 күннен бері толассыз жауын жауып, бірқатар елді мекен су астында қалды. Аймақта төтенше жағдай жарияланды. 

Қазір 400 мыңнан астам үйде жарық жоқ. Мыңнан аса адам эвакуацияланды. Скагит өзенінің бойындағы тағы 100 мың тұрғынды қауіпсіз аймаққа көшіру жөнінде бұйрық берілді. Снохомиш ауданының құтқару қызметі бір мәйіттің су басқан көліктің ішінен табылғанын хабарлады. Аймақта 8 желтоқсаннан бері күн райы құбылып,  тұрғындарды әбден әбігерге салды. Қатты жел тұрып, ағаштар құлап, тұрғын үйлерді зақымдады. Көршілес Орегон штаты да тілсіз жаудың зардабын тартып отыр. Мамандар мұны сирек кездесетін табиғи құбылыс екенін айтады. Жергілікті биліктің мәлімдеуінше, штатта құтқару қызметі күшейтілген режимде жұмыс істеп жатыр.

Фергюсон, Вашингтон штатының губернаторы:

- Қазіргі ахуал шын мәнінде тарихи сипат алып отыр. Скагит пен Сидар секілді өзендер су деңгейінің бұрын-соңды тіркелмеген көрсеткіштеріне жетті. Мұндай ауқымдағы су тасқынын Вашингтон штатының тұрғындары осы уақытқа дейін бастан өткерген емес. Осыған байланысты біз азаматтарды жергілікті билік белгілеген эвакуациялау талаптарын бұлжытпай орындауға шақырамыз. Бұл — ең алдымен тұрғындардың өз қауіпсіздігі үшін маңызды. Сонымен қатар эвакуация талаптарын елемей, қауіпке барған адамдарды құтқару кезінде төтенше жағдай қызметкерлерінің де өміріне қатер төнетінін ұмытпау қажет.