Саммит қарсаңындағы Вашингтон

Саммит қарсаңында Вашингтон C5+1 форматындағы кәсіпкерлер конференциясын өткізеді.

Бұл туралы АҚШ Мемлекеттік департаменті хабарлады. Әйгілі Кеннеди орталығындағы жиын Президенттер саммитімен қатар ұйымдастырылады. Осыған қарап АҚШ-тағы қызу қарбаласты байқауға болады. Сонымен оныншы саммитке дайындық қалай? Ақ үйдің қандай жоспары бар?

Вашингтонда дәл қазір қоңыр салқын күз. Ауа райы жайдары. Осындай 15-17 градустағы сынап бағанасы бейсенбіге дейін жалғасады деп тұр. Дәл осы Ақ үйдің оңтүстік жағында тұрмыз. Бұл жердегі мына су бұрқақтың ар жағындағы есікте Орталық Азия президенттері Дональд Трамппен кездесіп, осы бір тарихи ғимараттың ішінде C5+1 форматындағы саммитті бастайды. Бұлай айтуымызға тамыз айындағы еуропалық лидерлердің Ақ үйге келген сәті себеп. Президенттер саны 3-тен жоғары болған сәттерде меймандарды оңтүстік алаң жағынан қарсы алады немесе дәл осы қара қақпа ашылып жатқандағыдай президенттер кортежі Ақ үйдің батыс қанатындағы екіжақты, көпжақты кездесулер өтетін бөлімдерге қарай өтіп кетеді.

Осы сюжет түсірілімі саммиттен екі күн бұрын жасалғандықтан, Ақ үйге осынша жақын келіп тұрмыз. Ал ресми шара өтетін сәтте, ғимараттың өзі тұрмақ, маңайындағы бақтар да қоршауға алынып, қатаң күзет бақылауына түседі.

Әдетте президенттер келер кезде Ақ үйдің іші-сыртындағы жағдай қатаң болғанмен, қазір бұл жақтағы жағдай жайбарақат. Арнайы протест те жүріп жатыр бұл жерде. Бұл Тиграй өңіріндегі саяси ахуалға қатысты АҚШ президентінің көңілін аударуға қатысты арнайы демонстрация акциясы жүріп жатыр. Ал мына жақта АҚШ пен әлемнің түкпір-түкпірінен келген туристер Ақ үйдің алдындағы фото-естеліктерін жасап жатыр. Ал мына жақта ақ шатырлардың ішінде Ақ үйдің шығыс жағындағы қауіпсіздік шаралары ұйымдастырылған. Яғни Ақ үйдің маңайында әрқашан әртүрлі жағдай, у-шу болып жатады. Бірақ саммит күнінде бұның барлығы басылып, қауіпсіздік шарасы өте қатаң түрде сақталады.

Саммиттің өзге де мәліметтері әзірге ашық жарияланбаса да, одан тыс оқиғалар қатарында дәл осы Кеннеди орталығында өтетін кәсіпкерлер конференциясы бар. АҚШ астанасында көк туымыз желбіреп тұрған санаулы орындардың бірі дәл осы нысан. Мемлекеттік департамент мамандары, елшілер, сенаторлар, Дональд Трамптың арнайы өкілдері ұйымдастырған жиында Орталық Азия мен АҚШ елдерінің мәдени-экономикалық байланысы ұлықталып, тың даму жолдары талқыланады.

Авторлары: Ердана Ержанұлы, Эндрю Фанг