Венесуэлада АҚШ соққыларынан кейін төтенше жағдай енгізілді

Qazaq24.com, Azh.KZ дереккөзінен алынған мәліметтерге сүйене отырып ақпарат жариялайды..

Каракаста бірнеше жарылыс болды. Ел билігі АҚШ-ты әскери агрессия жасады деп айыптап, төтенше жағдай жариялады, деп хабарлайды Евронью́с.

3 қаңтар күні түнгі сағат 2 шамасында Венесуэла астанасы Каракаста кемінде жеті жарылыс тіркелді. Қала тұрғындары төмен ұшқан әскери ұшақтардың дыбысын естіген.

Венесуэла билігі АҚШ-тың әскери әрекеттерін «агрессия» деп атап, елде төтенше жағдай енгізді. Ақ үй бұл жағдайға қатысты әзірге түсініктеме берген жоқ. Ал АҚШ-тың Азаматтық авиация федералдық басқармасы (FAA) Венесуэла әуе кеңістігінде коммерциялық рейстерге тыйым салынғанын хабарлады.

Қаладағы жағдай

Каракастың әртүрлі аудандарында адамдар көшеге шыққан. Оңтүстік аудандағы ірі әскери база маңында электр жарығы өшкен.

Әлеуметтік желілерде тараған ақпаратқа сәйкес, АҚШ әскері Каракастағы және басқа аймақтардағы әскери нысандарға «Чинук» тікұшақтарының көмегімен соққы жасаған. Куәгерлер Ла-Карлота әскери аэродромында және Фуэрте-Тиуна негізгі әскери базасында жарылыстар болғанын айтқан.

Венесуэла билігі АҚШ-ты Каракас, Миранда, Арагуа және Ла-Гуайра штаттарындағы азаматтық және әскери нысандарға шабуыл жасады деп айыптады.

АҚШ пен Венесуэла арасындағы шиеленіс

CBS News тілшісінің хабарлауынша, соққы беру туралы бұйрықты АҚШ Президенті Дональд Трамп берген. Ол соңғы айларда Венесуэла аумағына әскери соққы жасайтынын бірнеше рет ескерткен болатын.

Жақында АҚШ әскері есірткі контрабандасына қатысы бар деген күдікпен кемелерге соққы жасаған. Ал Венесуэла жұма күні АҚШ-пен есірткі саудасына қарсы келісім жасауға дайын екенін мәлімдеген еді.

Венесуэла Президенті Николас Мадуро АҚШ-тың Кариб теңізінде тамыз айынан бері жүргізіп келе жатқан әскери қысым кампаниясы елді үкіметін ауыстыруға және мұнай мен пайдалы қазбаларға қол жеткізуге бағытталғанын айтты.

Ресми мәлімдеме

Венесуэла үкіметі халықаралық қауымдастыққа жолдаған мәлімдемесінде:

«АҚШ-тың қазіргі үкіметі Венесуэла аумағы мен халқына қарсы аса ауыр әскери агрессия жасады. Бұл әрекетті біз қабылдамаймыз, айыптаймыз және қатаң түрде қарсылық білдіреміз», — делінген.

Мәлімдемеде АҚШ-тың мақсаты Венесуэланың стратегиялық ресурстарын, әсіресе мұнай мен пайдалы қазбаларды күшпен иемдену екені айтылған. Үкімет елдегі әлеуметтік және саяси күштерді мобилизация жоспарын күшейтуге шақырды.

Бүгін, 14:00

Маңызды жаңалықтар мен жаңартуларды өткізіп алмау үшін Qazaq24.com сайтын қадағалаңыз.