VTB Bank Қазақстандағы еншілес банкінен 45,19 млрд теңге дивиденд алады

Ресейлік VTB Bank Қазақстандағы еншілес ұйымы – Банк ВТБ (Қазақстан) АҚ-ның 2025 жылғы қаржылық есебін бекітіп, табысты бөлу туралы шешім қабылдады.

Қабылданған шешімге сәйкес, 45,19 млрд теңге дивиденд ретінде төленеді. Бір жай акцияға шаққанда төлем мөлшері 6 127,11 теңгені құрайды.

Дивидендтер акционердің шотына 90 күн ішінде теңгемен аударылады. Бұл ретте бейрезидент табысына салынатын салық ұсталады.

Салыстыру үшін, 2024 жылдың қорытындысы бойынша банк 41 млрд теңге таза пайда тапқан. Оның 32,37 млрд теңгесі дивидендке бағытталып, бір акцияға 4 389,58 теңгеден төленген. Қалған 8,6 млрд теңге банктің өзінде қалдырылған.