Ядролық державалар арасындағы жоғары деңгейдегі диалогты жаңғырту қажет Ашықбаев

- Халықаралық іс-қимылдың жаңа, икемді форматтары зор маңызға ие бола бастағанына қарамастан дәстүрлі, әмбебап институттар мен платформалар әлі де жаһандық істерде маңызды рөл атқарады. Дегенмен бұл институттар да ХХІ ғасырдың күрделі шындығы мен сын-тегеуіріндеріне сай дамуы тиіс. Осы тұрғыдан алғанда БҰҰ-ны реформалау аса қажет әрі жалтара алмаймыз. Бұл ретте оның халықаралық бейбітшілік пен қауіпсіздігі қолдауға бағытталған негіз құраушы жауапкершілігі өзгеріссіз қалуы тиіс, - деді Сыртқы істер министрінің бірінші орынбасары.

Осы орайда ол ең алдымен Қазақстан БҰҰ-ны реформалауды, ондағы Азия, Африка және Латын Америкасы елдерінің барынша әділ өкілдігін кеңейтуді, орта державалардың сенім мен зәкір ретіндегі рөлін нығайтуды қолдайтындығын айтты.

- Екіншіден, БҰҰ-ның жарғысын сақтауды және институттарын нығайтуды, көнерген процедураларын жай ғана сақтап қоймай оның архитектурасын қазіргі қаманғы сын-тегеуріндерге бейімдеуді жақтаймыз. Осы орайда егемендік, аумақтық тұтастық және жанжалдарды бейбіт реттеу сияқты негіз құраушы қағидаттары мүлтіксіз сақталуы тиіс. Үшіншіден, ядролық державалар арасындағы жоғары деңгейдегі диалогты жаңғыртуға, сонымен қатар жаппай қырып-жою қаруы қатерін айтарлықтай төмендетуге бағытталған көпжақты іс-әрекетті жандандыруға шақырамыз. Қазақстан бұл күш-жігерге өз үлесін қосуға және ХХІ ғасырдағы адамзат баласының басты мақсаты ядролық қарусыз әлем құруға ат салысуға дайын, - деді Ержан Ашықбаев.

Айта кетейік, форум барысында Орталық Азия сараптамаларын әлемдік зерттеу қауымдастықтармен біріктіретін платформа іске қосылды.

ҚР Президенті жанындағы Қазақстанның стратегиялық зерттеулер институты ұйымдастырған іс-шараға әлемнің 20 елінен 40-қа жуық шетелдік сарапшы, жетекші «ақыл-ой орталықтарының» басшылары мен зерттеушілері қатысып жатыр. Форум аясында өтетін 9 тақырыптық сессияда әлемдік саясат пен халықаралық қатынастардың негізгі бағыттары талқыланбақ.