Юн Сок Ёль өмір бойына сотталу үкіміне апелляция берді

Апелляция экс-президенттің адвокаттары тарапынан үкім шыққаннан кейін бес күн өткен соң берілді. Ол 2024 жылғы желтоқсандағы бүлік ісі бойынша сотталған. Тергеу нұсқасына сәйкес, әскери жағдай енгізу әрекеті сәтсіз аяқталғаннан кейін болған оқиғалар бүлік ретінде бағаланған.

— Біз бұл шешімге қатысты мәселелерді тек сот хаттамасы үшін ғана емес, болашақ тарихи құжаттар үшін де нақты көрсетуді өз міндетіміз деп санаймыз. Арнайы прокурордың шамадан тыс айыптауы мен соған негізделген бірінші инстанция сотының қарама-қайшы шешімі, сондай-ақ оның саяси астары туралы үнсіз қалмаймыз, — делінген адвокаттар мәлімдемесінде.

Сеул орталық аудандық соты өткен бейсенбі күні Юн Сок Ёль әскери жағдай жарияланғаннан кейін Ұлттық жиналыстың жұмысына кедергі келтіру мақсатында парламент кешеніне әскер жіберуге ұмтылған деп таныды. Сот мұны Конституцияда көзделген бүлік ұғымына сәйкес келеді деп шешкен.

Экс-президентпен бірге тағы жеті айыпталушыға үкім шықты. Олардың қатарында бұрынғы қорғаныс министрі де бар, ол 30 жылға бас бостандығынан айырылды.

Өткен айда Юн Сок Ёль қамауға алуға кедергі жасау айыбы бойынша өткен бөлек сот процесінде бес жылға сотталған болатын.

Ал оның жұбайы, Оңтүстік Кореяның бұрынғы бірінші ханымы Ким Кон Хи 12 тамыздан бері қамауда отыр. Ол акция бағасымен айла-шарғы жасады деген күдікке ілінген.