Зеленский Путинді Киевке шақырды: Дипломатиялық текетірес жалғасуда

Украина Президенті Владимир Зеленский Ресей басшысы Владимир Путинге келіссөздерді Киевте өткізуді ұсынды. Бұл Ресей президентінің көмекшісі Юрий Ушаковтың «егер Украина лидері шынымен диалогқа дайын болса, Мәскеуге келсін» деген мәлімдемесіне қайтарылған жауап болды, деп хабарлайды Arasha.kz.

Айта кетейік, Ресей тарапы Зеленскийді Мәскеуге осыған дейін, қыркүйек айында да шақырған болатын. Сол кезде Украина президенті бұл қадамды «келіссөздердің өтпеуі үшін жасалған әдейі әрекет» деп сипаттаған еді.

Бұл жолы Зеленский өз жауабын ашық әрі қатқыл білдірді:
«Егер ол батылы жетсе, мен оны Киевке жария түрде шақырамын. Бірақ кездесуді қаламайтын, алайда оны тікелей айтуға жасқанатын тараптар ғана осындай «Мәскеуге кел» деген сылтауларды алға тартады», — деді Украина лидері.

The New York Times басылымының мәліметінше, Абу-Дабиде өткен алғашқы раундта Украина мен АҚШ келіссөзшілері Донецк облысына АҚШ бітімгерлерін орналастыру немесе демилитаризацияланған аймақ құру мәселесін көтерген.

Дегенмен, қазіргі жағдай күрделі. Мәскеу экономикалық қиындықтарға қарамастан, бітімгершілік контингент бойынша ұсыныстарды қабылдамай отыр.

Ал, Киев «Анкоридж формуласы» деп аталатын территориялық ымыраға (жерді беру арқылы бейбітшілікке келуге) үзілді-кесілді қарсы.

Осындай қайшылықтарға қарамастан, Вашингтон Эмираттағы кездесулерге оң баға берді. Дональд Трамптың кеңесшісі тараптардың территориялық мәселелер бойынша көзқарас алшақтығын азайту жолына түскенін меңзеді.