Зеленский әлемдік қауымдастықты Путинге қысымды күшейтуге шақырды

АСТАНА, 16 қазан – Sputnik. Украина басшысы Владимир Зеленский халықаралық қауымдастықты Ресей президенті Владимир Путинге қысымды күшейтуге шақырды, деп хабарлады РИА Новости.

"Путин әлемнің не айтып жатқанын естімейді, сондықтан әзірге ол түсінетін жалғыз тіл – қысым тілі болып тұр. Санкциялар арқылы, алыс қашықтық қаруы арқылы қысым жасау керек", - деді ол Telegram каналында.

Зеленский бұл АҚШ пен Еуропаға байланысты екенін, олардың күші қақтығыстың ұзақтығына тікелей әсер ететінін мәлімдеді.

Дональд Трамп 17 қазанда Ақ үйде Владимир Зеленскиймен кездесуді жоспарлап отырғанын осы аптаның басында жариялады. Ал Зеленский Ақ үй басшысымен кездесуінде ұзақ қашықтық қаруын тағы да сұрайтынын жеткізді. Өткен аптада Трамп Украинаға америкалық қанатты зымырандарды жеткізуге қатысты шешім қабылдағанын, бірақ Киевтің оларды қалай пайдалануды жоспарлап отырғанын білгісі келетінін мәлімдеді.